ASNN – Java e 22-të e Kategorisë Superiore të Kampionatit Kombëtar të Futbollit do të luhet në fundjavë. Tre takime janë të programuara për t’u zhvilluar të shtunën, ndërsa dy të dielën. Sfida hapëse e javës do të jetë ajo Kukësi-Tirana, e cila do të luhet në Stadiumin “Kukës Arena”, duke nisur nga ora 13:30. Në të njëjtën ditë do të luhen edhe dy takime të tjera, të dyja duke nisur nga ora 16:00.

Në Stadiumin “Arenën e Demave” në kryeqytet, Partizani, do të përballet me Egnatian, në sfidën midis vendit të parë dhe të dytë në Kategorinë Superiore. Të kuqtë do të kërkojnë të rikthehen te fitorja, ndërsa në anën tjetër, rrogozhinasit do të tentojnë të regjistrojnë triumfin e 4-t radhazi në Kategorinë Superiore, për të thelluar akoma më shumë epërsinë në krye të renditjes.

Ndeshja tjetër që do të luhet në të njëjtën orë është ajo midis Teutës dhe Skënderbeut. Durrsakët ende nuk e kanë regjistruar triumfin e parë për këtë vit në Superiore dhe do ta kërkojnë ta arrijnë këtë në Stadiumin “Niko Dovana” ndaj Skënderbeut. Në anën tjetër, korçarët duan vazhdimësinë pas triumfit në Stadiumin “Arena Kombëtare” ndaj Tiranës.

Të dielën do të luhen edhe dy takimet e fundit, të dyja duke nisur nga ora 13:30. Laçi do të presë në fushën e vet Vllazninë, ndërsa Erzeni do të përballet me Dinamon.