ASNN – “Festival” golash në kryeqytet. Tirana mundet 3-4 në Stadiumin “Arena Kombëtare” përballë Skënderbeut. Në takimin tjetër të mbrëmjes, të luajtur në kryeqytet, Tirana dhe Skënderbeu kanë dhuruar një 45-minutësh të parë intensiv, me 5 gola të shënuar. Pas një 10-minutëshi të parë me lojë të luftuar, është Liço që ul një top me kokë dhe Franklin godet, duke përshëndetur rrjetën në minutën e 12-të. Tirana është tulatur nga goli i parë dhe, 5 minuta më pas, pëson edhe të dytin, kur harkimi nga këndorja gjen Shaqen, i cili me një goditje me kokë ndëshkon sërish portierin bardheblu, Abdullahun.
Sidoqoftë, 10 minuta më pas, Tirana e ka gjetur golin kur kryesori Ferataj konsultohet me Sistemin e Ndihmës-Gjyqtarit të Videos (VAR) për një prekje të topit me dorë brenda zone nga Liço dhe jep 11-metërsh për bardheblutë, që kthehet më pas në gol nga Abazaj. Por festa e Tiranës është jetëshkurtër, pasi në minutën e 32-të, është Liço, padyshim lojtari më i spikatur i takimit, që godet me kokë dhe gjen golin e 3-të të korçarëve. Megjithatë, valsi i golave do të vazhdojë, pasi 4 minuta më pas, Përgjoni godet me kokë dhe çon topin në rrjetë, duke shënuar dhe duke shkurtuar kështu hendekun e golave për Tiranën.
Sidoqoftë, pjesa e parë do të mbyllet me epërsinë minimale të Skënderbeut me shifrat 3-2, ndërsa e dyta do të ketë të njëjtën tablo, pasi janë korçarët që gjejnë sërish rrugën e rrjetës me Frenklin, që plotëson në minutën e 62-të dygolëshin e tij në këtë sfidë. Megjithëse kryeqytetasit do të mbeten 10 lojtarë në minutën e 73-të kur Hoxhallari merr kartonin e dytë të verdhë dhe del nga loja me karton të kuq, Tirana do ta gjejë golin e 3-të 11 minuta më pas, me anë të Patrikut. Nuk ka më gola deri në fund dhe Skënderbeu mund Tiranën 4-3 në kryeqytet dhe ngjitet në kuotën e 25 pikëve.
