ASNN – Kombëtarja e veteranëve të Shqipërisë ka nisur nga puna edhe për këtë vit, teksa prej disa ditësh në mjediset e “Shtëpisë së Futbollit” janë kryer disa seanca stërvitore, me qëllim që skuadra të jetë e gatshme gjatë gjithë kohës, pasi në vijim do të zhvillohen edhe ndeshje miqësore. Në seancën e fundit ishin të pranishëm disa prej lojtarëve të cilët kanë dhënë kontribut për fanellën kuqezi në të kaluarën.

Ndërkohë është zhvilluar edhe një ndeshje kontrolli në “Shtëpinë e Futbollit” ndaj skuadrës së Nën-17-vjeçarëve të Dinamos. Kombëtarja e veteranëve të Shqipërisë gjatë gjithë kësaj kohe do të grumbullohet për të kryer seanca stërvitore edhe ndeshje kontrolli në mënyrë që lojtarët të jenë në formë sa më optimale për të marrë pjesë në ndeshjet që do të organizohen mes veteranësh.

Të grumbulluar do të jenë shumë emra të njohur që kanë shkruar historinë me fanellën kuqezi. Prej ditësh, Federata Shqiptare e Fuitbollit (FSHF) po punon për të organizuar disa ndeshje miqësore, që mund të zhvillohen në muajin mars dhe prill. Sfidat miqësore janë shumë të rëndësishme, pasi FSHF synon që në të ardhmen Kombëtarja e veteranëve të Shqipërisë të marrë pjesë edhe në turne ndërkombëtarë.