ASNN – I padriblueshmi, Ardian Ismajli, mbrojtësi kuqezi, si Virgil Van Dijk. “Sofascore” nxjerr statistikat e sezonit. Qendërmbrojtësi i Kombëtares shqiptare, Ardian Ismajli është një nga lojtarët kuqezi që ka pasur një ecuri mjaft pozitive në Evropë përgjatë këtij sezoni.
Paraqitja e shkëlqyer e tij në klubin e Empolit ka marrë më në fund vlerësimin e duhur. Sipas statistikave të përpunuara dhe të botuara nga faqja e specializuar për statistikat, “Sofascore”, mbrojtësi kuqezi, është një nga futbollistët që nuk është dribluar asnjëherë deri më tani në sezonin futbollistik 2023/2024.
Së bashku me të, në listën e publikuar nga Sofascore renditet edhe futbollisti i Liverpool, Virxhil Van Dajk. Një lajm i shkëlqyer ky jo vetëm për Ardian Ismajlin, por edhe për Kombëtaren e Shqipërisë. Ismajli ka treguar një formë fantastike jo vetëm në radhët e Empolit, por edhe në radhët e Kombëtares shqiptare, ku ishte pa dyshim një nga më të mirët në fushë.
