ASNN – Kategoria Superiore e Kampionatit Kombëtar të Futbollit do të çelë siparin për vitin 2024 me javën e 19-të, që do të luhet e ndarë në 3 ditë. Të premten, më datë 12 janar do të luhet sfida e parë e javës së 19-të, Dinamo City-Tirana. Kjo ndeshje e rëndësishme do të nisë në orën 17:00 dhe do të zhvillohet në stadiumin “Niko Dovana”.
Një tjetër takim interesant është dueli mes Egnatias dhe Skënderbeut, përballje që do të luhet të shtunën më 13 janar në “Egnatia Arena” duke nisur në orën 13:30. Në të njëjtën ditë do të luhet edhe sfida tjetër mes Partizanit dhe Teutës në “Arenën e Demave”, që nis në orën 17:00. Dy sfidat e fundit të javës do të zhvillohen të dielën, më datë 14 janar 2024.
Laçi-Erzeni do të jetë ndeshja e parë e ditës e cila do të luhet duke nisur nga ora 13:30 në stadiumin e “Laçit”. Java e 19-të e Kategorisë Superiore do të mbyllet me sfidën e derbit të veriut, Vllaznia-Kukësi, e cila do të zhvillohet në Stadiumin “Loro Boriçi” të Shkodrës, duke nisur nga ora 17:00.
