ASNN – Shqipëria dhe Italia do të përballen me njëra-tjetrën mbrëmjen e nesërme në Stadiumin “Arena Kombëtare”. Në prag të kësaj ndeshjeje, trajneri Roberto Mançini ka dalë në konferencën e zakonshme për shtyp, ku ka folur fillimisht për mungesën e Italisë së tij në Botëror. “Do të jetë një muaj i vështirë, ja kaq, një muaj i vështirë, që, për më tepër, nuk ka nisur ende, – ka thënë ai fillimisht, i pyetur nga mediat italiane. – Ky është fati ynë dhe nuk kemi çfarë të bëjmë. Kundër Maqedonisë së Veriut ishte një ndeshje absurde që përfundon në atë mënyrë një herë në 100 vjet.
“Do të jetë një muaj shumë i vështirë dhe nuk ka nisur ende, – ka vijuar ai. – Sinqerisht, që prej muajit mars e kam përjetuar shumë keq këtë situatë por ne i gabuam shanset tona. Për fat të keq, ky është futbolli, pas një gëzimi të madh erdhi shuplaka. Tani duhet të punojmë në mënyrën e duhur që të përpiqemi që kjo gjë të mos ndodhë më. Sidoqoftë, duhet të shikojmë aspektin pozitiv sepse do të kemi kohë për të bërë vlerësimet e duhura në mënyrë që në muajin mars të jemi gati për Eliminatoret.”
Më tej, kreu i stolit “axurr” e ka kthyer vëmendjen tek përgatitjet për ndeshjen e radhës, duke theksuar: “Përtej gjithçkaje, përtej hidhërimit që ne po kalojmë për momentin, ndeshjet duhen respektuar, e kemi bërë gjithmonë, do ta bëjmë edhe të mërkurën, e për më tepër që kemi gjëra të rëndësishme për të parë, për të vlerësuar, gjëra që mund të jenë të dobishme për ne nga marsi i vitit të ardhshëm e në vazhdim, kështu që është një ndeshje që ne e çmojmë. Kjo është e sigurt.”
“Edhe pse është një ndeshje që nuk vlen për ndonë turne, është një ndeshje ku do të provojmë disa djem të rinj, që ende nuk i njohim edhe aq mirë dhe diçka do të dalë”, – ka shtuar 57-vjeçari. Në vijim, trajneri i përfaqësueses fqinje ka folur për ndeshjen me Shqipërinë, duke i vlerësuar lart kuqezinjtë. “Respektojmë të gjitha ndeshjet, – ka pohuar ai. – Kështu duhet të jetë në sport. Nuk kemi ardhur për shëtitje. Kemi ardhur për të bërë një ndeshje të mirë. Por do të kemi vështirësi, sepse Shqipëria luan në shtëpi. Nuk është një skuadër e dobët.”
“Shpresojmë të bëjmë një ndeshje të bukur, – ka vijuar Mançini. – Lojtarët shqiptarë që luajnë në Itali janë të zotë. Shqipërinë e njoh mjaftueshëm, sespe njoh lojtarët që luajnë në Itali. Është kënaqësi që jam këtu në Tiranë, edhe pse kam qenë për herë të fundit këtu kur luaja me Shpresat e Italisë. Ndeshja e nesërme, siç kemi bërë gjithmonë, do të jetë e vlerësuar. Një ndeshje ku do të provojmë djem të rinj, që nuk janë njohur mirë.”
“Më bëhet qejfi që është kthyer Kieza dhe është në gjendje të mirë por duhet të rifitojë formën, – ka theksuar kreu i stolit “axurr”. – Është i rëndësishëm për ne. E njëjta gjë edhe për Zaniolon. Janë lojtarë të rëndësishëm. Janë të rinj dhe kur je i ri mund të përmirësohesh gjithmonë. Në këtë ndeshje do të testojmë lojtarë të rinj. Shpresoj të bëjmë një ndeshje të bukur dhe le të shikojmë se si do të shkojë”, – ka përfunduar trajneri i Italisë, Roberto Mançini.
