ASNN – Trajneri i Kombëtares kuqezi, Edoardo Reja, dhe kapiteni Etrit Berisha dolën mbrëmjen e sotme në konferencën e zakonshme për shtyp, në prag të sfidës miqësore me Italinë, që do të zhvillohet nesër në ora 20:45 në Stadiumin“Arena Kombëtare”. Edhe kapiteni Berisha në fjalën e tij u shpreh se në këtë ndeshje, kuqezinjtë  do të kenë mundësi të tregojnë vlerat e tyre, ndërsa komentoi edhe lojtarët e ardhur rishtazi në Kombëtare.

– Cila është rëndësia e kësaj ndeshjeje miqësore për ty?

– Kjo ndeshje është shumë e rëndësishme për ne. Sidomos pas atyre ndeshjeve jo të mira në Ligën e Kombeve. Për ne është shumë me rëndësi të na jepet kjo mundësi që t’i tregojmë vlerat tona. Dhe duke e njohur ekipin e Italisë dhe lojtarët, do mundohemi që të bëjmë një ndeshje shumë të mirë dhe të fortë pasi mendoj që kemi dhe kualitetet e duhura për ta bërë atë. Dhe shpresoj që të paraqitemi mirë dhe të marrim pikë.

– Çfarë presim nesër?

– E kam thënë gjithmonë, ndoshta është mendësi ballkanike që, ndonjëherë, na ndëshkon kjo, kur kemi ekipe që janë në të njëjtën kategori me ne ose më poshtë, ne diçka lëshojmë nga loja jonë apo përqëndrimi ynë. Kurse kur ekipe që janë më të forta se ne, zakonisht nuk kemi gabuar në këtë drejtim. Besoj që kemi mësuar nga këto gabime dhe shpresoj që në ndeshjet e ardhshme të qasemi më mirë të gjithë ne sepse mjafton një gabim dhe këto ekipe të ndëshkojnë. Kështu që sidomos në ndeshjen e nesërme duhet të jemi shumë të përgatitur dhe mos të lejojmë gabime sepse Italia ka një ekip shumë të fortë.

– E frikëson Berishën sulmi italian?

– Jo, nuk më frikësojnë. Jo vetëm Italia, por respekt kam për të gjithë. Italia është shquar për lojë të ekipit duke fituar edhe Evropianin. Nuk besoj që ka pasur ndonjë lojtarë që ka dalluar shumë, janë dalliar të gjithë. Ne duhet të bëjmë lojën tonë dhe pastaj të shpresojmë të kemi një rezultat pozitiv.

– Çfarë mendoni për lojtarët e rinj në Kombëtare?

– Djemtë kanë mundësi, kanë cilësi. Për ta është një mundësi shumë e mirë që të tregohen dhe të jenë me grupin. Pastaj gradualisht shihet edhe mundësia që do u jepet në të ardhmen. Mirëpo gjithsesi trajneri ka bërë mirë që i ka grumbulluar  dhe me siguri ka parë individë edhe në miqësoret e zhvilluara dhe me siguri që në të ardhmen do te kenë mundësi që ta tregojnë veten.