ASNN – Enea Jorgji është pa diskutim një nga gjyqtarët më të spikatur të futbollit shqiptar. Pas vlerësimit që mori disa kohë më parë nga Komiteti i Gjykimit të UEFA-s, që vendosi ta bëjë Jorgjin pjesë të Kategorisë së Parë, duke i dhënë mundësinë të jetë gjyqtar në ndeshje të rëndësisë së lartë, së fundmi, gjyqtarit shqiptar iu besua gjykimi i miqësores Turqi-Itali, e zhvilluar dy ditë më parë në “Turku Arena”, që përfundoi me shifrat 2-3. Një arritje e madhe kjo për Jorgjin, i cili ia doli me sukses në këtë sfidë të vështirë. Enea Jorgji mban edhe stemën e FIFA-s, ndërsa ka gjykuar edhe ndeshje të tjera të rëndësishme në Evropë.
Në një prononcim për faqen zyrtare në Internet të Federatës Shqiptare të Futbollit, ai shprehet se gjykimi i kësaj miqësoreje ishte mjaft i veçantë, që i ka dhuruar edhe emocione të mëdha. Jorgji thekson se kjo ndeshje nuk ishte e vështirë për t’u menaxhuar, pasi niveli që treguan skuadrat në fushë ishte i lartë. Por nga ana tjetër kjo i ka kërkuar një lexim më të detajuar të lojës. “Ishte një ndeshje e veçantë kjo kësaj radhe, pasi përballë Turqisë ishte Italia, kampione në fuqi e Evropës, – ka rrëfyer ai fillimisht. – Vetëm për këtë fakt, emocioni ishte i ndryshëm dhe shumë më i madh.”
“Ndeshje ku ekipet përfaqësuese janë përballur me njëra-tjetrën kam gjykuar edhe më parë, ndeshje eliminatore, në Ligën e Kombeve, por kjo kishte një qasje disi tjetër, pasi edhe niveli i skuadrave ishte me i mirë”, – ka shtuar ai. Po, sa e vështirë ishte për t’u menaxhuar? “Në fakt, loja që treguan skuadrat në fushë ma bëri këtë aspekt jo shumë të vështirë, por sigurisht më kërkoi më shumë angazhim, gjë që nuk më ishte kërkuar më parë dhe kjo solli aktivizimin e disa mekanizma apo nje llogjike, siç ishte leximi më i thelle i lojës dhe karakteristikat e lojtareve, detaj ky që në të tilla ndeshje kërkon edhe një përsosmëri më të mirë”, – vijoi Jorgji.
