ASNN – E përditshmja e njohur sportive spanjolle “AS”, i ka kushtuar një artikull të veçantë lojtarit të Kombëtares kuqezi, Keidi Bare, i cili do të zbresë të shtunën në fushën e stadiumit “RCDE” të Espanjolit, kur Shqipëria të përballet në një miqësore me Spanjën. Duke iu referuar episodit të 9 majit të shkuar, kur Bare u ngjit mbi murin e ballkonit të stadiumit, për të festuar rikthimin e skuadrës së tij në nivelin më të lartë të futbollit spanjoll, e përditshmja në fjalë thekson se shqiptari nuk e mori parasysh rrezikun e rënies 20 metra poshtë dhe u mbajt nga këmbët nga një shok skuadre dhe nga ish-portieri legjendar i Kamerunit, Tom N’Kono.
“Në mënyrën më të vështirë të mundshme”, e cilëson media në fjalë rrugëtimin e shqiptarit drejt suksesit në Spanjë, teksa të lindurit në vitin e vështirë 1997, i është dashur të largohet që në moshën 11-vjeçare nga Shqipëria dhe nga familja e tij, ndërsa 4 vjen më pas arrin të mbërrijë në gadishullin iberik. “Ishin kohë të vështira për prindërit e mi dhe gjithmonë i jam falënderues Zotit që ata janë gjallë”, – rrëfen shqiptari për të përditshmen sportive “AS”. Ai u rekrutua nga Panathinaikosi në Greqi, atje ku shkoi të jetonte vetëm, edhe pse ishte ende i mitur.
Pak më vonë, ai ishte në një provë njëjavore në Barcelonë, duke e provuar fatin edhe me Espanjolin, edhe me gjiganten katalane, atje ku të gjente shqiptarin tjetër, Albert Stroni, një ish-lojtar i Kompostelës, Méridas dhe Ourenses. “Kam sakrifikuar shumë më futbollin, sepse fëmijëria ime ishte pa miq dhe familjarë dhe tanimë kam arritur këtu ku jam, – vijoi ai, duke folur për gazetën spanjolle. – Unë nuk e di sesi është të kesh shokë, nuk dilja të luaja me moshatarët e mi, sepse topi i futbollit ishte gjithçka për mua.”
“Kam patur një periudhë të keqe, duke u larguar që në moshën 11-vjeçare nga familja, por duhet të mendoja për të ardhmen time”, – ka shtuar Bare. Dhe sakrifica u shpërblye, teksa në 2013-ën ai u bë pjesë e skuadrës së dytë të Atlétikos së Madridit, me të cilën do të debutonte në moshën 19-vjeçare në “Kupën e Mbretit” nën kujdesin e trajnerit Diego Simeone. “Kujtimet e fëmijërisë më erdhën në mendje, të gjitha sakrificat që kisha bërë dhe i thashtë vetes se “ia ka vlejtur””, – ka rrëfyer Bare.
Dhe vetëm kur ai nënshkroi për Malagën, pas 3 vitesh e gjysmë, Bare arriti të ribashkohej me prindërit e tij, që tanimë jetojnë me të në Barcelonë. I blerë nga Espanjoli në verën e vitit 2020, pas rënies nga kategoria, ai dëshmoi edhe një herë klasin dhe karakterin e tij, teksa, për shkak të kufizimeve të pagave dhe shpenzimeve, ai u regjistruar vetëm në javën e fundit të merkatos. “Futbolli ka të bëjë me marrjen e vendimeve, me të punuarit fort dhe me ndarjen e mendjes për të shkuar larg”, – thotë Bare në mbyllje.
“Sot, i mbiquajturi me përkëdheli si “pitbulli”, është i padiskueshgëm tek Espanjoli dfhe të shtunën do ta udhëheqë Shqipërinë e tij përballë Spanjës pikërisht në shtëpinë e tij, në Stadiumin “RCDE””, – e përfundon e përditshmja e njohur sportive spanjolle “AS” artikullin e veçantë kushtuar lojtarit të Kombëtares kuqezi, Keidi Bare.
