ASNN – Kombëtarja shqiptare ka nisur të hënën grumbulliminnë Barcelonë në kuadër të dy miqësoreve ndaj Spanjës dhe Gjeorgjisë. Stafi teknik dhe lojtarët e ftuar kanë udhëtuar drejt Spanjës dhe janë akomoduar pasdreke në hotel. Sipas burimeve pranë Kombëtares kuqezi, të gjithë lojtarët janë paraqitur sipas programit në grumbullim, me përjashtim të Amir Abrashit.

Mesfushori ka pësuar një dëmtim të dielën në ndeshjen e radhës me klubin e tij në Zvicër dhe u është nënshtruar testeve mjekësore. Deri të martën pritet një përgjigje përfundimtare nëse futbollisti do të mund të rikuperohet për miqësoret ose jo. Të fundit që i janë bashkuar grupit kanë qenë Armando Broja, Marash Kumbulla, Herdi Prenga dhe Qazim Laçi.

Pasditen e të hënës ekipi ka zhvilluar një seancë stërvitore në kompleksin “Rojalverd Val de Bas”, ku një pjesë e lojtarëve janë stërvitur rregullisht ndërsa ata që kanë luajtur të dielën me klubet në kampionatet përkatëse kanë kryer stërvitje pa shumë ngarkesa. Të martën kuqezinjtë do të kenë mundësi të zhvillojnë seancë stërvitore me ngarkesë të plotë dhe të nisin kolaudimin për dy miqësoret e marsit.