ASNN – Liga “Gjergj Kastrioti”, veprimtaria e përbashkët i volejbollit me skuadra nga Shqipëria dhe Kosova, ka mësuar skuadrat finaliste të edicionit të parë. Finalja i përket tërësisht ekipeve nga Shqipëria, teksa Tirana dhe Skënderbeu kanë eliminuar skuadrat e Kosovës. Pasi kishte fituar 3-1 në kryeqytet, Tirana e përmbushi misionin në fushë të huaj, teksa të shtunën fitoi pastër 0-3 edhe ndeshjen e kthimit në Gjilan ndaj Dritës vendase.
Seti i parë i takimit ishte me rivalitet, ndërsa me një bllok fitues në fund nga Preçetaj, vajzat bardheblu fituan 23-25. Në setin e dytë Tirana dominoi totalisht, për të fituar thellë 14-25. Rivaliteti u rikthye në setin e tretë, aty ku u nevojitën pikët shtesë. Xhenifer Pira ishte protagoniste e “match point”, duke vendosur setin 26-28 dhe të gjithë takimin 0-3. Në paraqitjen individuale, spikatën Van der Miir dhe Esdele, të cilat regjistruan nga 18 pikë secila për Tiranën.
Shkëlqeu gjithashtu edhe Antoneta Molla, autore e 15 pikëve.
Ndërkaq, të mbështetur fuqishëm nga tifozëria e zjarrtë, korçaret ia dolën të realizonin përmbysjen ndaj Fer Volejt, duke e fituar ndeshjen e kthimit me rezultatin 3-1 në takimin e luajtur në Pallatin e sportit “Tamara Nikolla”. Skënderbeu e nisi lojën furishëm duke shpërthyer që në dy setet e para, të cilat i fitoi 25-15 dhe 25-11. Fer Volej ngushtoi në 2-1, teksa triumfoi 22-25 në setin e 3-të.
Por, më tej seti i katërt ishte vetëm një formalitet, teksa ekipi nga Ferizaj “u zhduk” nga parketi me Skënderbeun që fitoi 25-5 dhe preu biletën për në finale.Anastasia Atepalina me 18 pikë ishte shënuesja më e mirë e takimit, duke qenë vendimtare për vendëset.
Të mërkurën, në orën 16:30 në Sallën Sportive të Lojërave me Dorë “Feti Borova” në kryeqytet do të zhvillohet beteja për trofeun mes Tiranës dhe Skënderbeut, ekipe që do të përballen edhe të dielën në finalen e Kupës së Shqipërisë.
Liga “Gjergj Kastrioti”
Volejboll – Femra
Gjysmëfinalet:
Takimet e para:
(19 shkurt 2022)
Fer Volej – Skënderbeu 3-2
Tirana – Drita e Gjilanit 3-1
Takimet e kthimit:
(26 shkurt 2022)
Skënderbeu – Fer Volej 3-1
Drita e Gjilanit – Tirana 0-3
