ASNN – Teksa sezoni i rrjetës shqiptare ka  hyrë tashmë në fazën e një kalendari të ngjeshur, janë luajtur të enjten dhe të premten dy takimet e para të javës së 14-të të Superligës së Kampionatit Kombëtar në volejboll për meshkuj. Tirana vijon të kryesojë renditjen, pas triumfit 3-0 ndaj Teutës, ndeshje e luajtur në “Fahrie Hoti”, në atë ishte edhe një provë gjenerale për ndeshjen e kthimit të gjysmëfinaleve të Ligës “Gjergj Kastrioti” në volejboll për meshkuj.

Një sfidë e dominuar nga volejbollistët bardheblu, që i fituan me lehtësi të trija setet ndaj durrsakëve, përkatësisht 25-11, 25-18 dhe 25-15, duke e hedhur kështu vështrimin tek sfida e së shtunës me Pejës, me të cilën e kanë fituar takimin e parë, të luajtur në Kosovë, me shifrat 3-1. Ndërkaq, mban gjallë shpresat për një vend në “play-off”-in për titull edhe Vllaznia, që mundi 3-0 Farka Volejin (25-11, 25-8, 25-15) në Shkodër.

Kështu, pas 6 humbjesh radhazi, Vllaznia është rikthyer te fitorja në Superligën e volejbollit të meshkujve, sukses që i mungonte që prej 5 nëntorit. Kuqeblutë kanë mposhtur të premten në shtëpi Farka Volejin e vendit të fundit me rezultatin 3-0. Një fitore e pastër për shkodranët, të cilët u shfaqën mbizotërues në të 3 setet, duke i fituar ato përkatësisht në shifrat 25-11, 25-8 dhe 25-15. Gilman Talani me 17 pikë dhe Visar Lleshi me 13, ishin më të mirën në sulmin vendës.

Për Farkën, i vetmi që preku shifrat e dyfishta të pikëve ishte Albi Nazifi me 10, ndërsa skuadra e trajnerit Dritan Bardhi vijon të notojë në vendin e fundit të tabelës. Kujtojmë se java e 13-të, që ka nisur të enjten me sfidën Tirana-Teuta, e fituar 3-0 nga bardheblutë, ndërsa do të vijojë të shtunën me përballjet Skënderbeu-Studenti dhe Elbasani-Partizani.

Ndërkohë, të shtunën do të luhen gjithashtu edhe gjysmëfinalet e kthimit për Ligën “Gjergj Kastrioti” në volejboll për meshkujt, teksa Ferizaj prejt Erzenit në Kosovë, në takimin që nis në orën 14:00 dhe Peja përballet me Tiranën, në takimin që nis orën 18:00 në Sallën Sportive “Fahrie Hoti” në kryeqytet.

Kampionati Kombëtar

i Volejbollit – Meshkuj

Superliga

Java e 14-të

Të enjten, 24 shkurt 2022:

Tirana – Teuta                       3-0

Të premten, 25 shkurt 2022:

Vllaznia – Farka Volej          3-0

Të shtunën, 26 shkurt 2022:

Skënderbeu – Studenti       (14:00)

Elbasani – Partizani             (17:00)

Erzeni                                    (pushim)