ASNN – “Gjergj Kastrioti” ka nisur pa shumë bujë. Por nisma për një ligë të përbashkët është mirëpritur në komunitetin e volejbollit. Kështu të paktën thotë Sekretari i Përgjithshëm i Federatës së Volejbollit të Kosovës (FVK), Valon Nikqi. Ai ka treguar se ideja ka lindur në takimet që i kanë pasur me Federatën Shqiptare të Volejbollit (FSHV). Veprimtari të përbashkëta ka pasur edhe më herët, kryesisht për festa. Por kishte pajtueshmëri për bashkëpunim më të madh dhe u paraqit ideja për ligë të përbashkët.
U vendos që emri i saj të jetë i heroit kombëtar, Gjergj Kastrioti. “Marrin pjesë dy ekipe nga Kosova dhe dy nga Shqipëria në të dy konkurrencat, – ka thënë ai për mediat e Prishtinës. – Në gjysmëfinale zhvillohen nga dy ndeshje me sistem vajtje-ardhje dhe ekipi që e ka bilancin më të mirë prej dy takimeve, kualifikohet në finale. Finalet do të zhvillohen në Tiranë më 2 mars 2022.” Rritja e cilësisë së volejbollit në të dyja vendet shqiptare është prej synimeve të ligës. Në ndeshjet e para më të suksesshme ishin ekipet nga Shqipëria, duke fituar 3 prej 4 sfidave.
“Përfitimi kryesor është për ekipet që marrin pjesë në këtë ligë, – ka sqaruar nr. 2 i organizmit që qeveris sportin e rrjetës në Kosovë. – Do të kenë mundësi të zhvillojnë ndeshje më të forta se ndeshjet vendore, do të thosha përballje ndërkombëtare edhe pse jemi një popull. Tjetër karakter ose përfitim është socializimi mes ekipeve, të rritet bashkëpunimi mes ekipeve dhe federatave.” Barrën e financimit të kësaj veprimtari aktualisht po e mbajnë klubet. Ato kujdesen për akomodim dhe për udhëtim, ndërsa akomodimi i zyrtarëve të ndeshjeve i takon federatave përkatëse.
Për ndeshjet finale, shpenzimet i mbulon Federata e Shqipërisë. FVK-ja kishte mbuluar shpenzimet e turneut “Kupa e Pavarësisë”. Në bazë të formulës, i pari i Superligës së Kosovës luan me të dytin e Superligë së Shqipërisë dhe e kundërta. “Këtë vit e kemi filluar si një lloj testi dhe me më pak ekipe, – ka pohuar Nikqi. – Ideja është që vitin tjetër të fillojmë me ligë të rregullt dhe me më shumë ekipe, 3 apo 4. Por të shohim si po shkojnë gjërat këtë vit edhe pse gjithçka ka shkuar në rregull deri më tani dhe po presim që vitin e ardhshëm të vazhdojmë sipas planifikimit.”
“Ekipet e kanë mirëpritur ligën e përbashkët, janë të entuziazmuara. Kemi pasur kërkesë të ekipeve të femrave nga Kosova që numri të rritet, por këtë vit ishte me vetëm dy skuadra. Edhe ekipet nga Shqipëria dhe federata e kanë mirëpritur ligën. Është një risi që të kenë më shumë ndeshje me ekipet e Kosovës dhe me siguri se do te ketë rivalitet tjetër prej atij që i kanë në ndeshjet e kampionatit”, – ka përfunduar Sekretari i Përgjithshëm i Federatës së Volejbollit të Kosovës.
