ASNN – Mundi të mërkurën Maqedoninë e Veriut 2-1, takimi erdhi drejtpërdrejt në RTSH Sport. Grupi i 7-të i Eliminatoreve të Evropianit të Nën-19-vjeçarëve, është një tjetër veprimtari madhore që i është besuar Shqipërisë dhe ndeshjet e tij do të luhen nga data 10, deri më 16 nëntor në Elbasan dhe Rrogozhinë. Dhe Rrjeti i Radio-Televizionit Shqiptar vijon t’i sjellë këto evenimentet sportive ndërkombëtare dhe transmetuesi publik ka sjellë për sportdashësit drejtpërdrejt dy takimet e para të këtij grupi.
Duke nisur fillimisht me atë Maqedoni e Veriut-Serbi, të luajtur në Stadiumin “Elbasan Arena”. 45 minutat e para kanë parë Serbinë të mbizotërojë, duke krijuar një vëllim më të madh loje, por duke mos e konkretizuar dot atë në të njëjtën përqindje. Sidoqoftë, serbët kanë rrezikuar, por ka munguar edhe saktësia në finalizim, ndërsa në 3 raste kanë gjetur përballë portierin maqedonas, Tasev, në lartësinë e duhur. Përtej mbizotërimit të serbëve, pjesa do të mbyllet me shifra të paprekura.
Edhe e dyta do të shohë Serbinë më këmbëngulëse dhe, pas 9 minutash lojë, ajo do të fitojë një 11-metërsh, të shndërruar në gol nga Ajdar. Janë momente të mira ato të çerekorës së parë të pjesës së dytë për Serbinë dhe ajo gjen edhe golin e dytë, me të njëjtin autor, Ajdar, që finalizon një aksion të skuadrës së tij në minutën e 65-të. Gjysmëora e mbetur e ndeshjes do të shohë Serbinë të ulë ritmin, edhe e kënaqur me epërsinë e dyfishtë, ndërsa në krahun tjetër, Maqedonia e Veriut nis të reagojë, teksa nuk ka më gjë për të humbur.
Dhe këmbëngulja e maqedonasve shpërblehet 13 minuta para fundit, kur kapiteni Behar Feta, shkurton largësinë e golave me një goditje të zgjuar. Megjithatë, Serbia e mbron epërsinë minimale dhe merr fitoren e parë në grup dhe bashkë me të edhe 3 pikët e para. Në takimet e ardhshme, Serbia ndeshet me Shqipërinë, ndërsa Maqedonia e Veriut me Francën.
