ASNN – Kombëtarja shqiptare e futbollit ka nisur që prej ditës së së hënë përgatitjet dhe stërvitjen në kuadër të dy ndeshjeve të fundit ndaj Anglisë dhe Andorrës, të vlefshme për Kampionatin botëror “Katar 2022”. Në konferencën për shtyp kanë dalë të martën Qazim Laçi dhe Frederic Veseli, të cilët kanë folur për këto dy sfida që kuqezinjtë do të luajnë, fillimisht ndaj anglezëve në Uembli, më 12 nëntor 2021, ndërsa 3 ditë më vonë ndaj Andorrës më 15 nëntor 2021.
Qazim Laçi iu përgjigj fillimisht interesit të gazetarëve, teksa u shpreh i lumtur për rikthimin në Kombëtare pas dëmtimit, si dhe theksoi se grupi po përgatitet dhe po punon fort që të japë maksimumin ndaj Anglisë. Ai foli edhe për nivelin e ekipit, duke thënë se konkurrenca është rritur. “Ndihem shumë mirë tani, – ka thënë Laçi. – Kisha një dëmtim, e kalova shpejt. Jam shumë i motivuar që erdha këtu dhe ndihem çdo herë krenar që vij me ekipin Kombëtar.”
“Dhe po pres me shumë shpirt e zemër për ndeshjet, – ka vijuar mesfushori. – Besoj nga e gjithë ana taktike, do të rregullojmë dhe do të punojmë si në mbrojtje, si në mesfushë, si në sulm pasi kemi kundërshtar që do të jetë shumë i fortë. Do të punojmë shumë mirë në këto dy-tre ditë dhe do të japim maksimumin për të marrë një rezultat pozitiv.” Më tej, futbollisti kuqezi ka folur edhe për kundërshtaren e radhës, Anglinë.
“Të luash me ekipin e Anglisë, do të jetë një ndeshje shumë e fortë dhe e vështirë, por edhe ne do të përgatitemi shumë mirë, të marrim një rezultat dhe e kemi treguar veten tonë në të gjitha ndeshjet që kemi bërë, të vazhdojmë të japim maksimumin në këto dy ndeshje. Do të jetë hera e parë që do të luaj në një stadium të tillë si “Uembli”. Kur vij me Kombëtaren emocionet janë të forta dhe jemi shumë të lumtur kur jemi këtu.”
Laçi ka shtjelluar edhe çështjen e konkurrencës në ekipin kombëtar, duke thënë: “Trajneri i bën zgjedhjet dhe jep formacionin. Konkurrenca e ekipit në këtë nivel që kemi arritur dhe me këtë kombëtare që kemi tani është shumë e madhe, është rritur konkurrenca mes nesh dhe kjo është diçka e mirë për ne. Në skema të ndryshme të trajnerit, lojtarët janë përshtatur. Por ndeshja ndaj Anglisë do të jetë një ndeshje e vështirë dhe po përgatitemi.”
“Do të kemi një kundërshtar që ishte finalist në “EURO 2020” dhe po përgatitemi mentalisht dhe fizikisht për të bërë ndeshjen më të mirë. Do të japim maksimumin dhe të shpresojmë për rezultat pozitiv”, – ka përfunduar futbollisti i Kombëtares, Qazim Laçi.
