ASNN – Drita i merr vendin e parë Ballkanit pas javës së 12-të, ngjitet edhe Prishtina. Niveli më i lartë i Kampionatit të Futbollit të Kosovës, Superliga, ka mbyllur në fundjavë takimet e javës së saj të 12-të dhe vazhdon rrokada e kreut. Tanimë ai është bërë pronë e Dritës, e cila, me fitoren minimale të arritur të shtunën pasdreke në Gjilan përballë Malishevë, dhe që ishte e 3-ta radhazi, është ngjitur në kuotën e 22 pikëve.

Drita ka kështu një pikë më tepër sesa kryesuesja e deritanishme, Ballkani, e cila u mund të dielën 1-2 në Graçanicë përballë Ulpianës vendase. Në fakt, kjo ishte edhe humbja e parë këtë sezon për skuadrën nga Suhareka, e cila tashmë e ndan kreun e renditjes me ekipin tjetër të Gjilanit. Kjo e fundit nuk shkoi dot më larg se një barazim të shtunën në fushën e Dukagjinit, por pika e marrë e ngjit në kuotën e 21 pikëve, një më tepër sesa Drenica e Skënderaj.

Kjo e fundit mbetet në vendin e 4-t të renditjes, pavarsisht humbjes minimale të pësuar në kryeqytet përballë Prishtinës. Kjo fitore, që ishte e 4-ta për kampionen në fuqi, që ka marrë edhe 4 barazime dhe ka pësuar edhe po aq humbje, e ka ngjitur skuadrën kryeqytetase në vendin e 5-të të renditjes, tanimë në kuotën e 16 pikëve. Një pikë më pak ka Llapi, që, me fitoren 2-0 të arritur në fushën e Ferronikelit është ngjitur në vendin e 6-të të renditjes, duke iu larguar edhe 4-shes së fundit të renditjes.

Atje ku Ulpiana ka 13 pikë, Malisheva 12, Dukagjini 11 dhe Ferronikeli 10. Takimet e javës së 13-të të Superligës së Kosovës luhen fundjavën e ardhshme dhe spikat të shtunën pasdite dueli i kreut midis Ballkanit dhe Dritës, por edhe ai së dielës, midis Gjilanit dhe Prishtinës.

Superliga e Kosovës

Java e 12-të:

Të shtunën, 30/10/2021:

Drita – Malisheva                              1-0

Feronikeli – Llapi                              0-2

Dukagjini – Gjilani                            1-1

Të dielën, 31/10/2021:

Prishtina – Drenica Skënderaj       1-0

Ulpiana – Ballkani                            2-1

Renditja

Nr.       Skuadra                     N.        F.         B.        H.        Gsh-Gp          Pikë

1. Drita e Gjilanit           12        6          4          2          13-7                22
2. Ballkani                     12        5          6          1          15-9                21
3. Gjilani                         12        5          6          1          15-10              21
4. Drenica Skënderaj   12        6          2          4          17-12              20
5. Prishtina                    12        4          4          4          14-12              16
6. Llapi                           12        4          3          5          15-15              15
7. Ulpiana                      12        3          4          5          13-21              13
8. Malisheva                  12        3          3          6          11-12              12
9. Dukagjini                   12        2          5          5            9-12              11
10. Feronikeli 12        3          1          8            5-17              10