ASNN – Kampionati Kombëtar i Futbollit për Femra do të ngrejë siparin për edicionin e 13-të futbollistik ditën e shtunë, me tre ndeshjet e para, teksa të dielën e 3 tetorit do të zhvillohen edhe dy ndeshjet e tjera. Ky edicion i ri premton emocione dhe lojë të bukur, duke marrë parasysh edhe seriozitetin e klubeve për të rritur ekipet e tyre të femrave, por edhe mbështetjen e palëkundur të Federatës Shqiptare të Futbollit, që rreth 20% të buxhetit të përgjithshëm të saj e kalon te futbolli i femrave.
Janë 11 skuadra që do të marrin pjesë në këtë edicion të kampionatit të femrave. Gjithçka do të nisë të shtunën, me derbin e kryeqytetit Kinostudio-Tirana, që do të jetë ndeshja hapëse e këtij sezoni të ri dhe që do të luhet në Qendrën e Ekipeve Konbëtare në Kamëz, duke nisur nga ora 11:00. Ekipi i Tiranës merr pjesë për herë të dytë në këtë kampionat, teksa në edicionin e saj të parë arriti të siguronte vendin e 3-të në kampionat, ndërsa Kinostudio arriti të renditej në vendin e 7-të.
Ndërkaq, ditën e shtunë do të zhvillohen edhe dy sfida të tjera. Në ora 12:00, në aneksin e Stadiumit “Loni Papuçiu” do të zhvillohet sfida Apolonia-Partizani, një sfidë jo e lehtë për të dyja ekipet, që në sezonin 2020-2021 bënë paraqitje të mira. Fieraket e mbyllën duke u renditur në vendin e dytë, ndërsa të kuqet kryeqytetaset debutuese u renditën në vendin e 6-të, me 37 pikë të grumbulluara gjithsej në kampionat.
Drejt Shkodrës do të udhëtojnë korçaret e Skënderbeut, që do të luajnë kundër ekipit “Atletik Club”, i cili është emri i ri i ekipit të Akademisë AAS-së. Ndeshja do të zhvillohet në qytetin verior duke nisur nga ora 14:00. Dy sfidat e tjera do të zhvillohen ditën e diel. Në stadiumin “Roza Haxhiu”, ekipi i Lushnjës do të presë durrsaket e Teutës, me ndeshjen që nis në ora 11:00, teksa në Shkodër, 8-herë kampionet e vendit, Vllaznia do të luajë derbin e parë kundër Murlanit, emri i ri i ekipit të Juban Danjës, duke nisur nga ora 14:00.
Për efekt kalendari, ekipi i Tirana AS do të jetë pushim në këtë javë të parë, duke qenë se kampionati përbëhet nga 11 skuadra.
