ASNN – Kombëtarja shqiptare e femrave ka nisur që prej ditës së shtunë grumbullimin dhe stërvitjet për ndeshjet ndaj Kosovës dhe Belgjikës, të vlefshme për Eliminatoret e Kampionatit Botëror “Australi-Zelandë e Re 2023”. Nga grumbullimi në Elbasan, në një konferencë për shtyp kanë dalë të martën dy futbollistet, Megi Doçi dhe Endrina Elezaj, të cilat kanë folur në lidhje me objektivat e ekipit për këto dy ndeshje si dhe për synimin e skuadrës në tërësi, në lidhje me grupin F, ku përveç Shqipërisë, gjenden edhe Belgjika, Polonia, Norvegjia, Kosova dhe Armenia.
Shqipëria do të luajë ndeshjen e parë ndaj Kosovës më 16 shtator në “Elbasan Arena”, duke nisur nga ora 19:00, ndërsa më 21 shtator do të luajë ndaj Belgjikës në fushë të huaj. Megi Doçi, në fjalën e saj u shpreh se objektivi i ekipit është të zhvillojë ndeshje të mira dhe shpreson që ndaj Kosovës, skuadra të marrë 3 pikët për ta nisur mbarë këtë fushatë të re eliminatoresh. Gjithashtu, ajo theksoi se grupi F është një grup i vështirë, me skuadra si Polonia, Belgjika e Norvegjia, por vajzat kuqezi premtojnë se do të luajnë gjithçka në këto ndeshje.
Në fund, ajo i bën thirrje të gjithë tifozëve shqiptarë, t’i bashkohen të enjten Kombëtares së femrave për t’i mbështetur. “Objektivi ynë është të bëjmë ndeshje sa më të mira, – ka thënë fillimisht ajo. – Dihet që kemi një grup mjaft të mirë, duke pasur parasysh që pjesa më e madhe e ekipit kombëtar është tek ekipi i Vllaznisë dhe kemi bërë ndeshje të mira me këtë ekip, mendoj se edhe këtu do të bëjmë një paraqitje mjaft të mirë për të marrë rezultate pozitive. Kjo ndeshje është e rëndësishme për ne, për të nisur mbarë këto Eliminatore.”
“Do të futemi në fushën e lojës për të marrë një rezultat pozitiv, për të marrë 3 pikët dhe për të vazhduar mbarë Eliminatoret, – ka vijuar 24-vjeçarja. – Mendoj se jemi në një gjendje mjaft të mirë. I gjithë grupi është i plotë. Po punohet shumë, si nga shoqet e ekipit, ashtu edhe nga stafi teknik. I dimë shumë mirë ekipet që kemi përballë, janë dy koka grupi si Belgjika dhe Norvegjia. Do të rrezikojmë dhe do luajmë gjithçka ndaj tyre. Duhet ditur që ekipi ynë, nga viti në vit ka pasur rritje dhe kemi treguar që dimë të bëjmë lojë mjaft të mirë.”
“Janë ekipe që kanë vite në futboll dhe dinë shumë mirë të luajnë, sidomos Belgjika, Polonia, Norvegjia, – ka vijuar futbollistja e Vllaznisë, duke analizuar grupin F, ku bën pjesë edhe Shqipëria me Kosovën. – Mendoj se ekipi i ka të ditura objektivat e tij. Do të dimë mirë të shprehim mënyrën tonë të të luajturit dhe të bashkëpunojmë me njëra-tjetrën për të marrë rezultate pozitive në çdo lojë. Do t’u bëja një thirrje të gjithë tifozëve këtu në Stadiumin “Elbasan Arena”, pasi e kemi kthyer atë me të vërtetë në arenën tonë.”
“Të gjitha ndeshjet po i zhvillojmë këtu dhe do ishte një plus shumë i madh për ne që të jenë tifozët në stadium pasi është motivi kryesor për të bërë një ndeshje mjaft të mirë dhe për të marrë rezultate pozitive”, – ka përfunduar futbollistja e Kombëtares kuqezi të “topkëmbës” së vajzave, Megi Doçi.
