ASNN – Kategoria Superiore e Kampionatit Kombëtar të Futbollit do të nisë rrugëtimin e edicionit të 83-të të tij, që zë fill më datë 10 shtator 2021, pra ditën e premte, ndërsa sezoni i ri i Kategorisë së Parë do të ngrejë siparin nga data 11 shtator, pra, të shtunën.
Departamenti i Garave dhe Veprimtarive në Federatën Shqiptare të Futbollit (FSHF) ka zhvilluar këtë të enjte një seminar informues me delegatët e ndeshjeve të kampionateve të Kategorisë Superiore dhe Kategorisë së Parë në mjediset e “Shtëpisë së Futbollit”.
Drejtuesi i këtij departamenti, Marjus Sulejmani shpjegoi në mënyrë të detajuar për delegatët detyrat dhe përgjegjësitë që kanë ata për të organizuar në mënyrë të suksesshme këto ndeshje. Gjithashtu, ky edicion i Kategorisë Superiore do të nisë me një risi.
Në të gjitha ndeshjet e kësaj veprimtarie do të aplikohet Sistemi i Ndihmësgjyqtarit të Videos (VAR), një nga investimet më të mëdha të Federatës Shqiptare të Futbollit.
