ASNN – Veterani italian: “Në karrierë kam garuar me pilotë tepër të fortë”. Për më shumë se dy dekada, Valentino Rosi ka garuar në nivelin më të lartë të motoçiklizmit botëror. 21 vjet në Moto GP, ku italiani e ka matur veten kundër më të mirëve të çdo brezi, për të krijuar atë që sot është një legjendë e gjallë. Lista e rivalëve që kanë vuajtur, disa më shumë se të tjerët, përballë motorit me “46” në pistë është e panumërt.
Me rastin e lamtumirës së tij, Vale ka folur për 175 pilotët me të cilët ai ka garuar në 500 cc dhe Moto GP. Në rend kronologjik, Valentino rishikoi rivalët që e shoqëruan në hapat e tij të parë në kategorinë e madhe, dhe atje ai takon emra të tillë si Xhon MekGinis, Aleka Barrosh, Kolin Eduards ose Anton Gober. “Nga Barroshi mësova të frenoja dhe të hyja në kthesë, sepse isha shumë i shpejtë, – ka zbuluar Rosi. – Me Xhonin jam gjithmonë në kontakt.
“Me Kolinin dhe Antonin kam shijuar shumë brenda dhe jashtë pistës”, – ka shtuar veterani italian. Më vonë, tashmë në Moto GP, i mbiquajturi “Doktori” pranon se nga talenti i pilotëve të tillë si Kejsi Stoner apo Horhe Lorenco ka vuajtur shumë: “Nëse flasim për talentin, Kejsi ishte i pakapërcyeshëm, – pohon 42-vjeçari. – Horheja ishte gjithashtu i pamposhtur, nuk meritoja një partner si ai te “Jamaha”.” Ndërsa emocionohet kur shfaqet emri i Simonçelit.
“Ishte një fatkeqësi e vërtetë, madje edhe mënyra në të cilën ndodhi gjithçka … një turp i vërtetë”, – thotë Rosi. Në fund ai flet për numrin “93”. Lidhur me rivalitetin e tij me Mark Márkezin, Valentino siguron se “ai është një rival i madh dhe një nga më të mirët”, por pranon se nuk ndihet “shumë mirë me të në pistë” dhe thotë: “Ai është i vështirë të mposhtet”.
I pyetur nëse një ditë do të nënshkruajë paqen me pilotin spanjoll, legjendari italian i motoçiklizmit tha: “Sa kohë do të më duhet që të shkoj mirë me Mark Markezin? Mendoj 20 ose 30 vjet…”.
