ASNN – Drejtuesi i skuadrës gjermane: “Jam i kënaqur me gjeneratën e re në kompani”. Toto Volfi thotë se skuadra e “Mercedes”-it në Formula 1 të jep shpesh ndjesinë e një “kampusi universitar”, pasi e sheh atë të evoluojë te gjenerata e ardhshme e anëtarëve të ekipit. “Mercedes” aktualisht po lufton për të zgjeruar rekordin e tij të 7 titujve “kampionë bote” për pilotë dhe konstruktorë, duke u përballur me një sfidë të ashpër me “Red Bull”-in në Botërorin e këtij viti të Formulës 1.
Rekordi fitues i “Mercedes” shtrihet në të gjithë epokën hibride të Formulës 1, atë “V6”, por ekipi ka sjellë një sasi të madhe të talenteve të reja gjatë magjisë së tij dominuese. Ndryshimi i fundit i “Mercedes”-it ndodhi në fillim të korrikut, kur drejtori teknik, Xhejms Elison, kaloi në rolin e shefit teknik, duke i hapur rrugën Majk Eliotit për të kaluar në pozicionin e tij të vjetër. Drejtori i “Mercedes”-it në Formula 1, Toto Volf, ka folur më parë për nevojën për të vazhduar sjelljen e talenteve të rinj dhe për të siguruar që trashëgimia e ekipit të vazhdojë, duke futur një krenari dhe përgjegjësi në përfaqësimin e tij.
Në një intervistë për Motorsport.com, Volfi theksoi rëndësinë që ekipi të përshtatet me sfidat me të cilat përballet, duke thënë se “Mercedes”-i duhej të vazhdonte të shpikte për të ecur përpara. “Një ekip i suksesshëm sportiv nuk është diçka që mund të ngrihet si një organizatë statike, por është diçka që duhet të evoluojë, sepse duhet të përshtatet, – tha austriaku. – Është një përzierje mes përvojës, entuziazmit dhe kuriozitetit të të rinjve. Ekipi ynë gjithmonë ka shpikur për të ecur përpara. Kur kaloj nëpër kompani, shoh ende fytyrat e të gjithë njerëzve që kanë qenë atje që nga fillimi, por shoh kaq shumë të rinj dhe të reja.”
“Ndonjëherë më duket si një kampus universitar, gjë që është e mrekullueshme, duke parë udhëheqësit e brezit të ardhshëm që vijnë, – vijoi ai. – Dhe ka kaq shumë punë, që është sjellë në zhvillim nga kjo gjeneratë e ardhshme. Kjo është vërtet diçka e bukur ta përjetosh personalisht dhe si kompani.” “Mercedes”-i kërkon të rrisë epërsinë e tij në krye të të dy renditjeve, pasi në Belgjikë këtë fundjavë Formula 1 kthehet pas pushimit të tij veror, me 12 gara të mundshme për t’u zhvilluar para fundit të vitit.
Skuadra është vetëm 12 pikë larg “Red Bull” në krye të renditjes së konstruktorëve të makinave, ndërsa Ljuis Hemiltoni është vetëm 8 pikë përpara Maks Verstapenit në renditjen për pilotë.
