ASNN – Al-Kelaifi nuk e ka mbyllur merkaton me ardhjen e Mesit. Duket se merkatoja e Paris SG-së nuk do të mbyllet me ardhjen e Lionel Mesit. Këtë e ka konfirmuar vetë presidenti i klubit, Al-Khelaifi, i cili pranon se është në bisedime me dy mesfushorët, Pol Pogba dhe Eduardo Kamavinga. Kjo lëvizje mund të arrihet edhe në 2022-shin, kur të dy lojtarët mund të vijnë me kosto zero, pasi iu mbaron kontrata me skuadrat përkatëse, Mançester Junajtid dhe Renën.
Nëse me ardhjen e Mesit merkatoja te gjingandja pariziene dukej e përfunduar, Al-Khelaifi nuk mendon të njëjtën gjë. Ai paralajmëroi një javë më parë se ardhja e argjentinasit mund të mos jetë e fundit në Paris dhe është e përditshmja franceze, “L’Équipe” që e ka konfirmuar këtë gjë të martën, duke siguruar që parizienët po ndjekin nga afër situatën e Pogbasë dhe Kamavingas. Sa i përket mesfushorit të Mançester Junajtid, Paris SG-ja nuk nxitohet dhe mund ta marrë atë falas në 2022-shin.
Gjithçka tregon se Pogba nuk do të rinovojë me “Djajtë e kuq” dhe, nëse ai mund të vijë në kryeqytetin francez këtë verë, Leonardo duhet të shesë së pari disa lojtarë për ta bërë operacionin të zbatueshëm. Sidoqoftë, gjëja më e mundshme është që futbollisti francez të arrijë sezonin e ardhshëm me kosto zero. Për Kamavingan, situata është shumë e ndryshme nga ajo e Pogbasë. Edhe pse mesfushori përfundon kontratën e tij në 2022 dhe nuk dëshiron të rinovojë, Rena mund ta lerë atë të largohet për një shifër që do të ishte rreth 30 milionë euro.
Kamavinga është e qartë se nuk do të rinovojë me Renën dhe është duke pritur një telefonatë nga Paris SG-ja, edhe pse nuk përjashtohet mundësia që të largohet falas si Pogbaja, në 2022-shin. “L’Équipe” vazhdon të këmbëngulë që Pogba ose Camavinga mund të mbërrijnë në Paris para 1 shtatorit, pasi Al-Khelaïfi mund të ketë një “as” të fundit nën mëngë.
