ASNN – Hodo: Teuta është mundur 1-0 nga Shamrok Rovers, në ndeshjen e parë të turit të tretë të Ligës së Konferencës. Por goli i pësuar në minutat e fundit të ndeshjes së luajtur në Irlandë, nuk i ka shuar shpresat e skuadrës durrsake për t’u kualifikuar më tej në këtë veprimtari ndërkombëtare.
Zëvendëstrajneri i Teutës, Bledar Hodo, ka theksuar se gjendja e skuadrës është e mirë dhe ndaj irlandezëve të enjten do të bëjnë më të mirën. “E kemi detyrim kualifikimin, – ka thënë ai. – Do të luajmë në sulm për të shënuar.” Teuta kërkon fitoren, pra përmbysjen e rezultatit të ndeshjes së parë.
Këtë synim zëvendëstrajneri Hodo, e bazon në faktin se tani e njohin më mirë skuadrën kundërshtare, me pikat e saj të forta e të dobëta. Duke besuar dhe synuar në një lojë ofensive, Hodo ka thënë se Aleksi do të luajë në qendër të mbrojtjes. Teuta beson te goli, e ndoshta edhe në përmbysjen e rezultatit.
Por duket se skuadra është përgatitur edhe për goditjet e 11-metërshave. “Jemi përgatitur edhe për 11-metërshat”, – pohon ish-futbollisti. Edhe kapiteni i Teutës, Renato Arapi është në të njëjtën linjë me zëvendëstrajnerin e tij. Ndeshja Teuta-Shamrok Rovers, luhet në stadium “Elbasan Arena” në orën 20:00.
