ASNN – Zyrtarizohet ndarja, klubi katalan e konfirmon zyrtarisht pamundësinë e rinovimit. Lionel Mesi dhe Barcelona kanë zyrtarizuar “divorcin” midis tyre të enjten. Gjigandja katalane ka deklaruar se ishte e pamundur që të rinovohej kontrata e Mesit, për shkak të pengesave financiare dhe stukturore të Ligës Spanjolle. Kështu, ylli argjentinas dhe Barcelona mbyllin bashkëpunimin 21-vjeçar midis tyre. Skuadra e Barcelonës ka konfirmuar largimin e yllit argjentinas Lionel Mesi. Në një njoftim të postuar të enjten në faqen e saj zyrtare në Internet, gjigandja katalane ka deklaruar se ishte e pamundur që të rinovohej kontrata e Mesit, për shkak të pengesave financiare dhe stukturore të Ligës Spanjolle.
“Pavarsisht se FC Barcelona dhe Lionel Mesi kishin arritur një marrëveshje dhe synimin e qartë të dy palëve për të nënshkruar një kontratë të re sot, kjo nuk mund të ndodhë për shkak të pengesave financiare dhe strukturore (rregulloret e Ligës Spanjolle), – sqaron njoftimi në fjalë. – Si rezultat i kësaj situate, Mesi nuk do të qëndrojë në FC Barcelona. Të dyja palët janë thellësisht të pikëlluara që dëshirat e lojtarit dhe klubit nuk do të përmbushen përfundimisht. FC Barcelona shpreh me gjithë zemër mirënjohjen e tij për lojtarin dhe kontributin e tij për klubin, si dhe i uron atij më të mirat për të ardhmen në jetën e tij personale dhe profesionale”, – përfundon njoftimi i klubit katalan.
34-vjeçari konsiderohet si njëri nga lojtarët më të mëdhenj në historinë e futbollit, ndërsa luajti plot 778 ndeshjen me skuadrën e parë të Barcelonës, duke realizuar 672 gola e duke dhënë pasimin e fundit edhe në 305 gola të tjerë. Ai ka fituar me Barcelonën pothuajse çdo gjë çka mund të fitohej. Mesi fitoi 10 trofe të kampionatit spanjoll, 8 Kupa të Spanjës, 7 Superkupa të Spanjës, 4 trofe të Ligës së Kampioneve, 3 Superkupa të Evropës dhe tri Kupa të Botës për Klubet. Së fundmi, Messi kurorëzoi karrierën e tij edhe me një trofe me Argjentinën, pas triumfit në Kupën e Amerikës. Argjentinasi është gjashtë herë fitues i Topit të Artë, teksa është favoriti kryesor për të rrëmbyer një çmim të tillë edhe këtë sezon.
Messi u transferua te Barcelona në vitin 2000 nga klubi argjentinas i Njuell Olld Bojs.
