ASNN – “Covid-19”-ta anulon garat e Formulës 1 dhe Moto GP-së në Australi. Frika nga epidemia i detyron autoritetet vendore që të anulojnë garat e tyre. Formula 1 ende nuk e ka zëvendësuar këtë garë në kalendar, ndërsa Moto GP do të zhvillojë garën në Sëpang, në Malajzi, në vend të asaj në Australi. Kështu, bota e motorsportit ka marrë lajme të reja mëngjesin e së martës. Për shkak të masava të rrepta anti-“Covid-19” dhe vështirësive në logjistikë, në marrëveshje me Qeverinë e Shtetit të Viktorias, Formula 1 dhe organizatorja e Moto GP-së, “Dorna Sports”, kanë vendosur të fshijnë nga kalendari i 2021 Çmimin e madh të Australisë në të gjitha kategoritë.
Kështu Formula 1, nuk do të zbresë këtë vit në Melbërn, ndërsa Moto GP-ja duhet të heqë dorë nga cirkuiti spektakolar i “Filip Ajlënd”. Njëvendëshet duhet të garonin në cirkuitin e Melbërnit në fundjavën e 19-21 nëntor 2021, menjëherë pas Çmimit të Madh të Brazilit dhe para atij të Arabisë Sauditë. Pas anulimit të Çmimit të Madh të Singaporit, që u zëvendësua menjëherë me atë të Turqisë, për të mbajtur 23 gara në kalendar, tani drejtuesit e Formulës 1 janë të detyruar të heqin dorë edhe nga Australia. Ende nuk dihet se cili do të jetë cirkuiti që do të zëvendësojë atë të Australisë, në mënyrë që të ruhet kalendari me 23 gara i vitit 2021.
Një goditje vjen edhe për kampionatin e motorëve. Pasi do të anulohet edhe gara e pistës australiane, një nga më të bukurat e kalendarit. Fundjava në Australi ishte parashikuar për 22-24 tetor nga “Dorna Sports”, por tani urojnë që të rikthehet në 2022. Por duket se “Dorna” e ka gjetur zgjidhjen për t’i zhvilluar të gjitha garat e parashikuara që në fillim të vitit. Çmimi i Madh i Malajzisë në Sëpang do të zëvendësojë atë të “Filip Ajlënd”. Kështu gjithë logjistika menjëherë transferohet nga Tajlanda fqinje, gara e së cilës është në 15-17 tetor 2021. Ndërsa në fundjavën e 5-7 nëntorit 2021, zhvillohet gara në Portimao Çmimi i Madh i Portugalisë.
