ASNN – Skënderbeu është shpallur ditën e diel fitues i Kategorisë Superiore për grupmoshën e Nën-13-vjeçarëve për edicionin futbollistik 2020-2021, duke shkruar historinë në edicionin e parë që zhvillohet ky kampionat kombëtar. Juglindorët mundën me rezultatin e thellë 4-0 ekipin e Internacionalit të Tiranës, në ndeshjen që u zhvillua në Qendrën e Ekipeve Kombëtare në Kamëz mbrëmjen e sotme. Skuadra korçare ishte dukshëm më superiore në këtë sfidë, duke e mbyllur ndeshjen që në pjesën e parë të lojës.

Shkëmbi kalon Skënderbeun në epërsi që në minutën e dytë të takimit, duke gëzuar stolin korçar. 3 minuta më vonë, Proji shfrytëzon mjaft mirë një top të marrë, duke e dërguar drejt e në rrjetën e kryeqytetasve, të cilët e shohin veten në disavantazhin e dy golave në vetëm 5 minuta lojë. Internacionali krijon disa raste të mira për gol, por nuk gjejnë dot rrjetën. Në minutën e 24-t, është sërish Flavio Shkëmbi ai që shënon për juglindorët, duke trefishuar rezultatin. Skuadrat drejtohen në dhomat e zhveshjes, me Skënderbeun që e ka thuajse të sigurt titullin e parë “kampion”.

Pak minuta pas fillimit të pjesës së dytë të lojës, Shkëmbi gjen sërish rrjetën, duke shënuar edhe një 3-golësh personal në këtë ndeshje. Pavarësisht rasteve të krijuara nga kryeqytetasit, rezultati i ndeshjes mbetet i pandryshuar deri në fundin e 90 minutave, me Skënderbeun që triumfon 4-0. Ky ishte edicioni i parë i kampionatit të Kategorisë Superiore të Nën-13-vjeçarëve, një risi e Federatës së Futbollit, që ka rezultuar shumë e suksesshme dhe ka ngjallur interes nga klubet shqiptare si dhe nga futbollistët e vegjël që synojnë të bëhen profesionistë në të ardhmen.

Në përfundim të ndeshjes u zhvillua edhe ceremonia e organizuar nga FSHF me medaljet dhe trofeun që ju dorëzuan kuqebardhëve të Skëndërbeut nga ish-lojtari i ekipit kombëtar, Bedri Omuri.