ASNN – Veprimtaria e dytë e futbollit në vend, Kupa e Shqipërisë, ka luajtur të mërkurën dy sfidat e saj të gjysmëfinaleve, që, sikundër i gjithë ky sezon, janë vendosur me një takim të vetëm.  Vllaznia dhe Skënderbeu kanë siguruar në finalen e Kupës së Shqipërisë, pasi kanë mundur respektivisht Laçin dhe Teutën. Skënderbeu ka bërë surprizën e madhe në gjysmëfinalen e Kupës së Shqipërisë teksa ka eliminuar Teutën në shtëpinë e saj, edhe pse i mbetur me 10 futbollistë. Goli i Meksit që në minutën e dytë, me 11-metërsh, dhe ai i Elvi Berishës siguruan kualifikimin e korçarëve për në finale. Skuadra e drejtuar nga Migen Memelli ka bërë një ndeshje të madhe duke luftuar për gjithë pjesën e dytë me 10 lojtarë, pasi Berisha mori të kuq (i dyti i verdhë) menjëherë pas golit, sepse hoqi fanellën, por harroi që e kishte marrë një të verdhë më parë.

Në fakt, në ndeshjen e luajtur në Stadiumin “Niko Dovana”, gjithçka ka nisur në mënyrë të vrullshme. Pas vetëm 20 sekondash lojë, pas një dueli mes Hoxhës dhe Mensah, me arbitrin Jorgji, i cili akordon menjëherë penallti për korçarët. Ndëshkohet me karton të verdhë mbrojtësi i Teutës dhe por edhe futbollisti tjetër i durrsakëve, Albano Aleksi për protesta. Meksi tregohet i saktë nga pika e bardhë e 11-metërshit, duke e dërguar topin në krahun tjetër të portierit. Në pjesën e dytë të lojës, durrsakët u hodhën në sulm, me trajneri Edi Martini që aktivizoi Plakun, Grudën dhe Kapllanin.

Sidoqoftë, Teuta nuk ia doli të shënonte qoftë edhe një gol që do ta vinte në presion të madh Skënderbeun dhe tani duhet të fokusohet të kampionati. Megjithatë, “Djemtë e detit” janë në vendin e parë në Superiore dhe synimi kryesor është titulli kampion. Kjo është finalja e 7-të e Skënderbeut në historinë e Kupës së Shqipërisë. Korçarët e kanë fituar vetëm një herë kupën, atë kundër Laçit më 2018. Ndërkohë në finale janë ndeshur me Vllazninë më 1965 dhe e kanë humbur me rezultatin 1-0.

Kupa e Shqipërisë

Gjysmëfinalet:

Teuta – Skënderbeu            0-2

Shënues: Meksi 2′, Berisha 44′

Vllaznuia – Laçi                    1-0

Shënues: Hoxhaj 22’

Finalet e Skënderbeut

1958   Partizani – Skënderbeu       4-0

1965   Vllaznia – Skënderbeu        1-0

1976   Tirana – Skënderbeu           4-1

2012   Tirana – Skënderbeu           1-0

2017   Tirana – Skënderbeu           3-1

2018   Skënderbeu – Laçi               1-0