AlbanianSport.com 18/03/2021 19:25
ASNN – Janë shpërndarë diplomat për pjesëmarrësit e kursit për trajnerin e përgatitjes atletike, që organizohet nga Federata Shqiptare e Futbollit (FSHF). Në ceremoninë e organizuar të enjten, në mjediset e stadiumit “Arena Kombëtare” morën pjesë Sekretari i Përgjithshëm i FSHF-së, Ilir Shulku, stafi i Sektorit të Edukimit në FSHF si edhe stafi i përgatitjes atletike në Federatë, i përbërë nga Luixhi Febrari, Luka Laurenti dhe Iris Selimi.
Gjatë shpërndarjes së diplomave, Sekretari i Përgjithshëm Shulku, vlerësoi punën e mirë të bërë nga stafi i FSHF-së për organizimin e këtij kursi dhe u uroi sukses të gjithë pjesëmarrësve në karrierën e tyre. Gjithashtu, Shulku theksoi se Federata do të jetë gjithmonë e angazhuar në përgatitjen profesionale të gjithë aktorëve të futbollit, përmes kurseve të formimit për trajnerë, përgatitës atletikë, fizioterapistëve, video-analistëve, etj.
Kursi i trajnerëve të përgatitjes atletike u zhvillua për herë të katërt në dhjetor të vitit të kaluar dhe në të morën pjesë mbi 20 pjesëmarrës, të cilët punojnë nëpër klubet shqiptare të futbollit dhe e ushtrojnë aty këtë profesion. Këtë herë kursi u zhvillua me një format ndryshe, ku përveç specialistëve të sektorit të Edukimit në FSHF morën pjesë edhe trajnerët e përgatitjes atletike të Kombëtares, Luixhi Febrari dhe Luka Laurenti.
Një pjesë e mirë e leksioneve u bënë përmes platformave “online”, ku morën pjesë lektorë të njohur të fushës nga Italia dhe shkolla e njohur e Koverçianos. Pas përfundimit të leksioneve, pjesëmarrësit iu nënshtruan provimeve e më pas procesi u mbyll me diplomimin e tyre. Duke parë suksesin e këtij formati dhe interesin e madh, FSHF ka menduar ta rikthejë kursin e përgatitjes atletike dhe në fund të muajit prill do të zhvillohet kursi i radhës.
Ky kurs është një mundësi e shkëlqyer për të gjithë të interesuarit për t’u kualifikuar profesionalisht përmes eksperiencës më të mirë bashkëkohore dhe lektorë me emër. Sipas rregullores së Federatës Shqiptare të Futbollit, në çdo skuadër futbolli duhet të ketë një përgatitës atletik në stafin e saj, por edhe në stolin teknik.