ASNN – Dita e mërkurë dhe e enjte do të rikthejnë emocionet e gjysmëfinaleve të Kupës së Shqipërisë për futboll për femra, në Fier dhe Shkodër. Fituesja e Kupës së Shqipërisë në edicionin e kaluar, Vllaznia do të presë në Shkodër vajzat e Tirana AS-së, të cilat kaluan në gjysmëfinale pas një fitoreje të thellë në kryeqytet ndaj Teutës.

Kryeqytetaset do të tentojnë të surprizojnë shkodranet, çka në fakt duket e vështirë, pasi vajzat kuqeblu janë 7 herë fituese të këtij trofeu. Ndeshja do të zhvillohet ditën e mërkurë duke filluar nga ora 13:30. Ndërkohë nga ana tjetër, Apolonia do të presë në Fier kryeqytetaset e Tiranës, që luajnë për herë të parë në këtë veprimtari dhe do të tentojnë të surprizojë fieraket në një sfidë emocionuese.

Pas fitores së thellë që morën me Kinostudion, fieraket do të tentojnë të rikthehen sërish në ndeshjen finale të Kupës së Shqipërisë, ku nuk ia dolën të merrnin trofeun. Kjo ndeshje do të luhet ditën e enjte në Fier, në ora 13:00. Ashtu sikurse ndeshjet e fazave të mëparshme, edhe përballjet e kësaj faze do të luhen me sistem eliminimi direkt dhe do të vendosen me një takim të vetëm.