Në pjesën e parë, fillimi ka qenë i shpejtë për të dy ekipet, të cilët kërkojnë të afrohen në zonat përkatëse, njëkohësisht mbrojtësit e të dy ekipeve janë në gatishmëri për të larguar rrezikun. Shkëndijën e parë e jep Pengu, i cili shfrytëzon një pasim të Topllarit, por pret portieri dinamovit Lamellari. Në minutën e 18-të, Imami, fare pranë portës liqenore, ka goditur shtyllën horizontale të portës vendëse, ndërsa nuk ka mundur dot të shënojë.
Loja tashmë bëhet më e shpejtë dhe dinamovitët preferojnë kundërsulmin. Herë pas here Pengu e Cekici për vendësit, por edhe Capa e Turdiu për miqtë bëhen iniciatorë të sulmeve. Pas minutës së 33-të ka përpjekje të dinamovitëve për të hyrë në zonë, por edhe vendësit gabojnë para zonës kundërshtare. Vlen të përmenden në vijim dy pritje të portierit vendas, Mirakës, i cili në pozicion të vështirë arrin të shpëtojë portën e tij nga gjuajtjet e Turdiut.
Në pjesën e dytë, janë vendësit që këmbëngulin që në fillim dhe është sulmuesi Pengu, i cili brenda zonës shënon shumë shpejt pas topit të ardhur nga Pura në një goditje dënimi për vendësit. Tashmë loja bëhet më e shpejtë. Miqtë nuk pranojnë humbje dhe vihen në lëvizje, por edhe vendësit kërkojnë të sigurohen për fitore. Tenton përsëri Pengu në minutën e 53-të, por portieri mik grushton. Por Rrapo, në një ditë të mirë, që nga 20 metra gjen trekëndëshin e rrjetës.
Tashmë në lojën e vendësve për disa minuta ka siguri. Por dinamovitët nuk e pranojnë rezultatin dhe hidhen në sulm. Është Imami që shënon golin e vetëm të miqve, por që është zhvlerësuar nga goli i tretë i vendësve, që mban firmën e Topllarit dhe në fund 3-1.
Pogradeci – Dinamo 3-1
Shënues: Pengu 47’, Rrapo 54’, Topllari 83’ / Imami 61’
Pogradeci: Miraka, Rrapo, Bufasi, Hysenllari, Pere, Alillari (Pura 46’), Çerepi, Topllari, Shyti (Kuqo 80’), Çekiçi (Osmani 67’), Pengu. Trajner: A. Abazaj
Dinamo: Lamellari, Rexhepi, Shkalla, Duqi, Muça, Arifaj, Tafaj, Imami, Rezi (Sorra 84’), Capa (Ferraj 60’), Turdiu. Trajner: D. Mehmeti
Gjyqtarë: K. Kola, E. Potomi, R. Zaimi (Tiranë)
Kartonë të verdhë: Bufasi, Çerepi, Topllari, Hysenllari, Pengu / Duqi
