ASNN – Presidenti i FSHF-së, intervistë për një radio italiane, prek disa tema. Presidenti i Federatës Shqiptare të Futbollit, Armand Duka, ka dhënë një intervistë për radion italian “Kiss Kiss Napoli”, ku ka folur për disa tema të ndryshme, që nga kombëtarja shqiptare, te rikthimi i tifozëve në stadiume dhe rizgjedhjen e Gravinës si Presidenti i Federatës Italiane të Futbollit. “I kam dërguar urimet e mia me rastin e rizgjedhjes së tij si President i Federatës Italiane të Futbollit (FIGC), Gabriele Gravinës. Jam i lumtur që ai do të mund të vazhdojë punën e tij në krye të federatës edhe për një mandat tjetër, sepse jam i sigurt se ai do të kryejë më së miri detyrën e tij dhe do të ndihmojë futbollin italian të zhvillohet edhe më shumë”, – tha Duka.
Në cilësinë e anëtarit të Komitetit ekzekutiv të UEFA-s, ai është shprehet se mungesa e të ardhurave nga biletat e ndeshjeve ka goditur klubet evropiane, ndërsa shpreson që pas Anglisë edhe vendet e tjera të nisin zbutjen e masave kufizuese në futboll, duke lejuar një pjesë të spektatorëve në tribuna. “Bilanci financiar i klubeve evropiane është negativ pa spektatorë në stadiume: ka më pak sponsorë dhe më pak reklama, – ka thënë ai. – Bilanci sportiv nuk është i keq, po shkon mirë, ekipet po luajnë dhe nga pikëpamja sportive nuk kanë humbur shumë. Spektatorët në stadiume? Kjo nuk është diçka që varet nga UEFA, por nga autoritetet shtetërore të secilit shtet.”
“Në Angli kanë vendosur ta ndërmarrin këtë hap, ne shpresojmë që të ndodhë së shpejti edhe në pjesën tjetër të Evropës. Shpresa, pra, është që Euro 2020 të luhet me 50% të spektatorëve në tribuna. Që finalet e Euro 2020 të luhen vetëm në Angli është një mundësi: kanë mbetur edhe 4-5 muaj, le të shohim nëse situata do të ndryshojë ose përndryshe Anglia do të jetë një mundësi”, – thekson kreu i organizmit që qeveris futbollin shqiptar. “Jam i lumtur që lojtarët shqiptarë po luajnë mirë me ekipet e tyre përkatëse, shikoni për shembull paraqitjen e Xhimshitit të mërkurën me Atalantën. Shpresojmë që të bëjmë një paraqitje të mirë me ndeshjet zyrtare të muajit mars”, – shtoi Duka.
Në fund, Duka ka komentuar edhe zërat për një ofertë të pretenduar të Napolit për trajnerin kuqezi, Edoardo Reja, duke mohuar kategorikisht këtë opsion. “Reja te Napoli në vend të Gatuzos? Unë i kam dëgjuar këto thashetheme, por nuk di asgjë. Napoli nuk më ka kontaktuar kurrë dhe Reja nuk më ka thënë gjë për mundësinë e të bërit një punë të dyfishtë si trajneri i Shqipërisë dhe i Napolit. Por dua ta bëj të qartë, që është një mundësi për t’u përjashtuar kategorikisht: nuk mund të bëhet, një trajner nuk mund të jetë në një ekip kombëtar dhe në një klub në të njëjtën kohë. Nuk mund të ndodhë ”, – përfundoi presidenti i Federatës Shqiptare të Futbollit, Armand Duka.
