ASNN – Luhet takimi i parë i kthimit i turit të 32-shes së Ligës së Evropës, anglezët mposhtin Volsfbergerin 4-0. Totenhemi është skuadra e parë që siguron vendin në turin e 16-shes së Ligës së Evropës, pasi nuk është kursyer as në ndeshjen e kthimit përballë austriakëve të Volfsbergerit.
Skuadra e drejtuar nga trajneri portugez, Zhoze Murinjo, e kishte zgjidhur që në ndeshjen e parë çështjen e kualifikimit, duke fituar me shifrat e thella, 4-1 në Austri, por ka vijuar të fitojë edhe në ndeshjen e kthimit në fushën e vet, duke shënuar 4 gola të tjerë, këtë herë pa përgjigje.
Dele Ali hapi rrugën e golave në minutën e 11-të, duke kontrolluar bukur një pasim të Mat Dohertit dhe duke ekzekutuar akoma edhe më bukur brenda zonës, dhe duke e kaluar skuadrën londineze në epërsi. Me këtë epërsi minimale të vendasve do të mbyllen 45 minutat e para.
Ndërsa ato të dytat do të shohin Dele Alin sërish protagonist, teksa ai pason për Viniciusin në minutën e 50-të, për golin e dytë të Totenhemit, ashtu sikundër do të bëjë edhe 23 minuta më vonë, kur do të shërbejë për Gareth Bejlin, që shënon golin e 3-të të vendasve.
Fitorja e Totenhemit do të vuloset 7 minuta para fundit, kur Vinicius do të gjejë golin e dytë vetjak në këtë takim, dhe të 4-tin për skuadrën angleze, që pret tanimë e qetë të njohë kundërshtaren në turin tjetër të veprimtarisë së dytë të klubeve të kontinentit, Ligës së Evropës, kundërshtare që do të dalë nga 15 takimet e tjera të turit të 16-shes, që luhen të enjten.
