ASNN – Shkodranët vuajnë, por e mundin Apoloninë me një gol të vetëm të Shehit. Një 3-pikësh midis drithërimash, por një triumf që, edhe pse minimal është shumë i vyer për Vllazninë, e cila ka rigjetur të shtunën fitoren pas 3 ndeshjesh, duke mundur Apoloninë 1-0 dhe duke ruajtur epërsinë prej 3 pikësh në krye të renditjes së Kategorisë Superiore, pasi të gjitha skuadrat ndjekëse nuk gabuan.
Takimi i vlefshëm për javën e 19-të, që është gjithashtu edhe java e parë e nivelit më të lartë të Kampionatit Kombëtar të Futbollit dhe që u luajt në Stadiumin “Loro Boriçi” të Shkodrës, ka parë një lojë të ftohtë të të dyja skuadrave në 20 minutat e para, me Apolioninë që ruan disiplinën taktike dhe mbrohet mirë, ndërsa edhe Vllaznia nuk ka qartësinë për të ndërtuar raste të mira për shënim.
Pas minutës së 20-të zgjohen sidoqoftë shkodranët, por Isaevski tregohet më bujar se ç’duhet, ndërsa edhe goditja e lirë 5 minuta më pas, nuk shfrytëzohet siç duhet. Fierakët rrezikojnë pas një gjysmë ore lojë, madje dy herë, por pa rezultat, ndërsa 6 minutat e fundit të pjesës së parë sjellin dy raste të mira, por të pashfrytëzuara nga shkodranët. Kështu, me rrjeta të paprekura do të mbyllen 45 minutat e para.
Ndërsa ato të dytat, që do të shohin Vllazninë ta nisë më mirë, do të jenë të luftuara nga fillimi në fund. Kuqeblutë do ta kontretizojnë më në fund epërsinë e tyre në minutën e 57-të, kur Shehi do të kërcejë më lart se të tjerët dhe do të kthejë në rrjetë një harkim nga e djathta pas një aksioni të gjatë të vendasve. Vllaznia është euforike dhe rrezikon të gjejë shpejt në gol të dytë.
Por Apolonia nuk jepet dhe gradualisht e vë në vështirësi portierin Zogoviç, në dy raste në minutën e 73-të. 20 minutat e mbetura do të shohin njëp lojë të hapur nga të dyja skuadrat, me shkodranët që kërkojnë golin e sigurisë, por edhe me fierakët që kërkojnë me ngulm atë të barazimit. Pavarsisht gjithçkaje, edhe përtej një rasti flagrant të miqve në sekondat e fundit, mbyllet me fitoren minimale të Vllaznisë kjo përballje dhe Apolonia pëson humbjen e 3-të në këtë sezon përballë kuqebluve.
