ASNN – Janë luajtur sot të gjitha ndeshjet e javës së 10-të të Kampionatit Kombëtar të Futbollit për Femrave. Java nisi me supersfidën Tirana AS-Vllaznia. Një ndeshje e luftuar nga të dyja palët, ku në fund të 90 minutave gëzuan shkodranet. Loja nisi vrullshëm, me shkodranet që kërkuan dhe e gjetën golin që në minutën e gjashtë, me Zylfije Bajramaj. Epërsia nuk zgjati më shumë se 4 minuta, me kryeqytetaset që në minutën e dhjetë arritën të barazojnë me Trokën. Loja vazhdoi me kundërsulme derisa në minutën e 30-të, Bajramaj gjen golin e dytë personal dhe të dytin për skuadrën.

Dhjetë minuta më vonë, Megi Doçi trefishon rezultatin dhe shkodranet e mbyllin pjesën e parë në avantazh, me rezultatin 1-3. Pjesa e dytë vazhdon me të njëjtin ritëm, me vajzat e Tirana AS që kërkojnë të gjejnë golin për të ngushtuar rezultati, por janë sërish shkodranet që përmes Lufos shënojnë golin e katërt në minutën e 68-të. Bajramaj, në minutën e 81 shënon golin e pestë për skuadrën duke vulosur kështu rezultatin final dhe duke shënuar një 3-golësh personal. 1-5 mbyllet sfida për Vllazninë, të cilat deri më tani nuk e kanë diskutuar fitoren duke kryesuar renditjen me pikë të plota.

Në orën 13:00, nisi sfida Akademia AAS-Teuta. Vajzat e durrsake shtangën shkodranet në shtëpi, duke i marrë 3 pikë dhe duke i shënuar 3 gola. Durrsaket iu gëzuan golit të Habilit në minutën e 20-të, e cila kaloi në epërsi skuadrën e Teutës. Vajzat e Akademisë AAS tentuan të gjejnë rrjetën, por pjesa e parë u mbyll në favor të Teutës. Në pjesën e dytë ishin sërish vajzat e bregdetare që gjetën golin me Pucën në minutën e 50-të dhe më pas Kallabaci trefishoi rezultatin. Golin e nderit për shkodranet e shënoi Papaj në të 75-tën minutë.

Pavarësisht tentativave dhe lojës sulmuese, rezultati nuk ndryshoi dhe u mbyll në favor të Teutës, 1-3. Durrsaket e shohin tashmë veten në vendin e 8-të, me pikë të barabarta me Akademinë AAS, që me këtë humbje zbret në vendin e 9-të. Ndërkaq, Juban Danja priti në Shkodër kryeqytetaset e Kinostudios, të cilat i mundi me rezultatin e pastër, 3-0. Shkodranet hapin serinë e golave me Matilda Tanushi , e cila gjeti golin që në minutën e 20. Në pjesën e dytë, Vasa shënon dopietë, në minutën e 77-të dhe 84-t, duke regjistruar rezultatin 3-0.

Kinostudio shënon humbjen e radhës dhe gjenden në vendin e 6-të në renditje, me 15 pikë, ndërsa shkodranet në vendin e 4, me 21 pikë. Kurse derbi myzeqar është mbyllur në favor të Apolonisë, me rezultatin tenistik 6-0. Një ndeshje e fortë nga të dyja ekipet, me golin e parë që erdhi në fundin e pjesës së parë, në të 45-tën me Gashin. Në pjesën e dytë, L. Gashi shënon një dygolësh, në minutat 50 dhe 75. Klea Hamonikaj mendon për skuadrën, duke shënuar edhe 3 gola të tjerë në minutat 78, 79 dhe 85 dhe Apolonia shënon fitoren e radhës.

Duke mos vënë kështu në diskutim vendin e dytë në klasifikim ndërsa lushnjaret vazhdojnë me ecurinë negative, me 3 pikë pas 10 javëve kampionat. Edhe Partizani ka shpërthyer në gola në Bilisht. Një ndeshje e lehtë për të kuqet e kryeqytetit, të cilat fituan në fushë të huaj me rezultatin e thellë, 13-0, duke regjistruar kështu fitoren e radhës dhe renditen në vendin e 7-të, me 15 pikë ndërsa Bilishti e sheh veten në vendin e fundit me 0 pikë. Ndeshja e fundit e kësaj jave ishte ajo mes Tiranës dhe Skënderbeun, që fiksoi rezultatin 9-0.

Dygolëshi i Kamberit në minutat 4 dhe 16 hapi serinë e golave për Tiranën. Në minutën e 19-të, Aliaj trefishon rezultatin, ndërsa në të 31-ën, Kodra regjistron golin e katërt për Tiranën. Në të 43-ën, nga pika e bardhë e 11-metërshit, Metalla shënon për skuadrën e saj, duke mbyllur kështu pjesën e parë me rezultatin 5-0. Në pjesën e dytë, kryeqytetaset gjejnë edhe 4 gola të tjerë me Goron (53), Gjonin (60), Metallën (65) dhe Xhindolen (73). Mbyllet me rezultatin 9-0 kjo ndeshje, e cila mban Tiranën në vendin e 3-të, dy pikë larg Apolonisë dhe 5 pikë prapa kampioneve të Vllaznisë.

Kampionati Kombëtar

i Futbollit – Femra

Java e 10-të:

Të shtunën, 30 janar 2021:

Tirana AS – Vllaznia                        1-5

Akademia AAS – Teuta       1-3

Lushnja –  Apolonia             0-6

Juban Danja – Kinostudio  3-0

Bilisht Sport – Partizani       0-13

Tirana – Skënderbeu           9-0

Renditja

Nr.       Skuadra                     Pikë

1. Vllaznia                     30
2. Apolonia                    27
3. Tirana                         25
4. Juban Danja             21
5. Tirana AS                  19
6. Kinostudio                 15
7. Partizani                    15
8. Teuta                            9
9. Akademia AAS           9
10. Skënderbeu   6
11. Lushnja   3
12. Bilisht Sport   0