ASNN – Edhe pse të rinj në moshë, futbollistët e Milanit, të aktivizuar në ndeshjen kundër Torinos, treguan pjekuri dhe aftësi. Pioli i detyruar nga mungesat e shumta, i aktivizoi ata edhe në pozicione të tjera në fushë, e të gjithë dhanë më të mirën. Milani, me lojtarët e tij të rinj, kalon një tjetër provë pjekurie, duke u kualifikuar për në çerekfinalet e Kupës së Italisë.

Edhe njëherë tjetër u pa forca e grupit të Piolit, ku të gjithë janë në shërbim të skuadrës. Kjo duhet theksuar, sepse ky fakt po bën diferencën në skuadrën e kuqezinjve. Shembujt flasin vetë, Kalabria që bëhet mesfushor qendre, ishte ndër më të mirët kundër Torinos, ose Kalulu që ishte dhe mbrojtës i majtë edhe në qendër të fushës. Sakrifica që të kthejnë buzëqeshjen më pas.

Gjithçka po shkon mirë, aq sa edhe për Maldinin e Masarën bëhet i vështirë misioni për të sjellë diçka më të mirë nga merkato. Para së gjithash, duhet mbyllur rinovimi i kontratës me Hakan Çalhanollu. Futbollisti turk po luan mirë, dhe pas 11-metërshit vendimtar të realizuar kundër Torinos, firma e tij në kontratën e re mund të jetë dhurata e duhur për të gjithë milanistët.

Përsa i përket mbrojtjes, dëmtimi i Mohamed Simakanit dhe qëndrimi i tij dy muaj jashtë fushe, e ka detyruar Maldinin të heqë dorë për momentin, por jo përfundimisht. Ndaj vëmendja shkon drejt dy alternativave të tjera, Ozan Kabak të Shalke 04-ës e Fikajo Tomori, mbrojtësin e qendrës të Chelsea, për të cilin klubi londinez ka dhënë miratimin për t’u larguar.