AlbanianSport.com 12/01/2021 21:05

ASNN – Shqipëria e futbollit ka qenë në qendër të vëmendjes së UEFA-s në javët e fundit. Sigurisht, vendimi i Komitetit Ekzekutiv të UEFA-s, që Tirana të presë finalen e parë të veprimtarisë më të re në futbollin kontinental, Ligës së Konferencës, ka qenë i bujshëm dhe historik. Në numrin e fundit të revistës zyrtare të qeverisë së futbollit evropian “UEFA Direct”, emri i Shqipërisë, Tiranës, stadiumit kombëtar “Air Albania” dhe Federatës Shqiptare të Futbollit janë lakuar për dy tema të rëndësishme.

E para, është zhvillimi i finales së kësaj Lige të Konferencës në kryeqytetin shqiptar, i cili do të nisë nga sezoni i ardhshëm dhe i është dhënë një hapësirë e madhe, duke i bërë jehonë kësaj ngjarjeje. “Stadiumi, me një kapacitet prej 21,690 vendesh, në Tiranë, Shqipëri, do të presë finalen e parë në 25 maj 2022, siç u lajmërua nga Komiteti Ekzekutiv i UEFA-s më 3 dhjetor 2020”, – shkruhet në artikullin e posaçëm për këtë vendim.

Ky është një lajm i mirë për Shqipërinë, që sërish, përmes futbollit, ia doli të jetë në qendër të mediave europiane dhe të jetë në faqet e revistës së UEFA-s, duke ndikuar në imazhin e vendit. Po në këtë numër një hapësirë të konsiderueshme i është dhënë edhe 90-vjetorit të Federatës Shqiptare të Futbollit me nën artikull që shpjegon gjithçka, që nga hapat e para të këtij institucioni e deri te suksesi i kualifikimit për në finalet e Euro 2016.

“Kushtet e krijuara nga kufizimet për shkak të epidemisë së shkaktuar nga “Covid-19”-ta penguan disi Federatën në organizimin e një serie veprimtarish të programuara, por, pavarësisht kësaj, opinioni sportiv në Shqipëri e përjetoi atmosferën festive që FSHF përçoi nëpërmjet mesazheve të saj”, – shkruhet në artikullin e publikuar në botimin zyrtar të UEFA-s.