ASNN – Pas ndërprerjes së fundvitit si rrjedhojë e festave, këtë fundjavë rikthehet Kampionati Kombëtar i Futbollit për Femra, për të luajtur ndeshjet e javës së 7-të të tij. Në gjashtë duelet e kësaj jave spikasin përballjet Tirana-Juban Danja dhe Kinostudio-Partizani.

Vajzat bardheblu ndodhen në vendin e 5-të, në kuotën e 13 pikëve, dhe do të kenë përballë Jubanin, që, me 15 pikë mban vendin e 3-të në renditje, me pikë të barabarta me Apoloninë. Kjo e fundit pret këtë javë shkodranet e Akademisë “AAS” në fushën e vet, në Fier.

Në Kamëz, do të luajë vendi i 6-të dhe i 7-të me Kinostudion që pret Partizanin, që luan edicionin e parë në Kampionatin e Femrave. Tirana AS udhëton drejt Korҫës, ku do të përballet me Skëndërbeun. Kurse Vllaznia kryesuese do të luajë të dielën në Stadiumin “Reshit Rusi” përballë Teutës së vendit të 10-të.

Një ndeshje që parashikohet e lehtë në letër për shkodranet. Interesant është dueli ndërmjet Lushnjës dhe Bilisht Sport, me të dy skuadrat që ndodhen në kuotën e 0 pikëve dhe të shtunën në Stadiumin “Roza Haxhiu” kanë mundësinë të marrin pikët e para për këtë sezon.

Kampionati Kombëtar

i Futbollit – Femra

Java e 7-të:

Të shtunën, 9 janar 2021:

Lushnja – Bilisht Sport        ora 13:00

Tirana – Juban Danja          ora 13:00

Skëndërbeu – Tirana AS     ora 13:00

Apolonia – Akademia AAS ora 13:00

Të dielën, 10 janar 2021:

Kinostudio – Partizani         ora 13:00

Vllaznia – Teuta                    ora 14:00