ASNN – Davide Brivio largohet nga projekti “Suzuki” në Moto GP, për të marrë drejtimin e ekipit të “Renault” në Formula 1. Njeriu vendimtar në suksesin e Suzukit dhe atë të Joan Mirit në sezonin e kaluar, tashmë do të jetë shefi i ri i Fernando Alonsos. Ishte një mundësi që ishte përfolur për disa ditë dhe tashmë është një realitet. Davide Brivio merr drejtimin e skuadrës “Alpine Renault” në  Formula 1 dhe lë postin e tij si menaxher i “Suzuki Racing” në MotoGP.

Skuadra japoneze e ka bërë zyrtare largimin e italianit, gjë që e ve automatikisht atë përpara një sfide të re, për të gjetur zëvendësuesin e tij. Në këtë mënyrë, njeriu vendimtar në suksesin e “Suzuki”-t, i cili ka ndihmuar për ta shpallur Joan Mirin “kampion bote” në Moto GP, bëhet shefi i ri i Fernando Alonsos. Ky është një vendim i drejtpërdrejtë është marrë nga presidenti i “Renault Group”, Luka de Meos, i cili ka një marrëdhënie të shkëlqyer me Brivio, për një kohë të gjatë tashmë.

Prandaj, ai donte t’i besonte atij projektin e ri “Alpine”, i cili, në fund të fundit, kërkon rilindjen e markës së diamantit, për shkak të emblemës së “Renault”, në Formula 1. Brivio ende nuk ofron detaje për detyrën e re, por ai i bën të qarta arsyet e largimit të tij nga “Suzuki”. “Një sfidë e re profesionale, një mundësi e re, të cilën kam vendosur ta pranoj, – ka deklaruar ai.

“Ishte një vendim i vështirë, veçanërisht të largohesha nga grupi përrallor i njerëzve me të cilët kam punuar te “Suzuki”, – ka vijuar ish-drejtuesi i skuadrës japoneze që shijoi një triumf të dyfishtë në Moto GP këtë sezon. – Ndihem i trishtuar për këtë, por nga ana tjetër kam një motivim të madh për këtë sfidë të re. Diçka që ka qenë thelbësore kur unë duhej të zgjidhja midis rinovimit të kontratës sime me “Suzuki” ose fillimit të një eksperience krejtësisht të re.”