ASNN – Mançester Siti fiton derbin me Mançester Junajtid, përballet në finale me Totenhemin. Mançester Siti është finalisti i dytë i Kupës së Ligës Angleze, pasi ka fituar 2-0 të mërkurën në mbrëmje në derbin me Mançester Junajtid. Tanimë, skuadra e Pep Guardiolës do të përballet në finale me Totenhemin e drejtuar nga rivali i tij i kahershëm, Zhoze Murinjo. Siç dihet, kjo veprimtari është një tjetër ekskluzivitet madhor sportiv i Rrjetit të Radio-Televizionit Shqiptar, që i ka sjellë për sportdashësit drejtpërdrejt ndeshjet më të spikatura të saj.
Pasi ka njohur të martën në mbrëmje finalisten e parë të këtij sezoni, teksa Totenhemi ka mundur 2-0 në shtëpi Brentfordin, me nga një gol të shënuar për secilën pjesë loje, veprimtaria e 3-të e futbollit anglez, Kupa e Ligës, ka zhvilluar të mërkurën në mbrëmje edhe përballjen e dy gjysmëfinale, duke përcaktuar e finalisten e dytë, që ka dalë nga derbi i Mançesterit, midis Mançester Junajtid dhe Mançester Sitit.
Siç dihet, kjo veprimtari është një tjetër ekskluzivitet madhor sportiv i Rrjetit të Radio-Televizionit Shqiptar, që i ka sjellë për sportdashësit drejtpërdrejt ndeshjet më të spikatura të kësaj veprimtarie, dhe derbi i transmetuar në kanalin RTSH Sport, i ka mbyllur me rrjeta të paprekura 45 minutat e para. Skuadra vendase ka bërë një vëllim më të madh loje dhe ka ndërtuar raste për shënim, por më pranë golit, me anë të Kevin De Bryjnes, ka qenë skuadra mike, e cila ka goditur shtyllën e djathtë të portës së “Djajve të kuq”.
Por Mançester Siti do të kalojë në epërsi brenda 5 minutash nga fillimi i pjesës së dytë, me anë të Xhon Stouns. Skuada mike do të vijojë ta administrojë epërsinë minimale, përtej përpjekjeve të Mançester Junajtid dhe madje do ta thellojë atë 7 minuta para fundit të kohës së rregullt, me anë të Fernandinjos. Nuk ka më të papritura paskëtaj dhe Mançester Siti është finalisti i dytë i Kupës së Ligës Angleze, pasi ka fituar 2-0 në derbin me Mançester Junajtid.
Tanimë, skuadra e Pep Guardiolës do të përballet në finale me Totenhemin e drejtuar nga rivali i tij i kahershëm, Zhoze Murinjo.
