ASNN – Gara e parë e Botërorit të Formulës 1 për 2021-shin, ajo e Australisë, e programuar për të zhvilluar më 21 mars, mund të mos zhvillohet. Kjo për shkak të shtimit të numrit të të infektuarve me “Covid-19” në Melbërn. Në fund të muajit janar, Federata Botërore e Automobilizmit (FIA) dhe organizatorët e Çmimit të Madh të Australisë, do të dalin me një vendim zyrtar. Sipas kalendarit të miratuar nga FIA për vitin 2021, mendohet që të zhvillohen të 23 garat në mënyrë të rregullt, duke filluar nga Çmimi i Madh i Australisë.
Por kriza e shkaktuar nga virusi korona, me prirjen e re të shtimit të numrit të të prekurve, mund të sjellë modifikimin e parë, të këtij kalendari të Formulës 1. Dhe gara e Melbërnit, që zhvillohet gjithnjë në pistën e kompleksit “Albert Park”, e planifikuar për më 21 mars 2021, është “në ajër”. Sipas të gjitha gjasave po planifikohet një anulim i mundshëm në atë datë, por që mund të zhvendoset në një kohë tjetër, më të përshtatshme brenda vitit.
Por, masat e rrepta të vendosura në Australi për shkak të pandemisë, rrisin mundësinë që kalendari i Formulës 1 për 2021-shin, të mos fillojë sipas planit. Shitja e biletave për çmimin e parë të madh të sezonit nuk ka nisur, një gjë e zakonshme kjo në këto kohë epidemie globale. Në 2020-ën, shumica e garave që arritën të bëhen, u zhvilluan pa spektatorë në tribuna, me disa përjashtime dhe kapacitet shumë të kufizuar në rastet kur vendi u hap për tifozët.
Mbledhja për të vendosur për zhvillimin e “uverturës” së sezonit në Formula 1 në pistën e “Albert Park” bëhet rreth dy muaj para garës, kështu që para fundit të janarit do të duhet të merret një vendim. Në rast se Çmimi i Madh i Australisë nuk do të zhvillohet, FIA do të hapë Botërorin me garën në Bahrein, më 28 mars 2021, dhe të zhvendosë garën e Melbërnit ndoshta në vjeshtë, gjë që do të detyronte një rregullim për pjesën tjetër të kalendarit.
