ASNN – Kapitenia kuqezi shkëlqen sërish me Kuneon, merr vlerësimin e trajnerit. Ka shënuar 16 pikë, duke qenë shënuesja më e mirë e skuadrës së saj dhe bashkëshënuesja më e mirë e takimit, teksa e ka udhëhequr skuadrën e saj, Kuneon, drejt fitores në 3 sete në fundjavë ndaj Firences. Dhe Erblira Bici po e rikonfirmon plotësisht veten tek skuadra që militon në nivelin më të lartë të volejbollit italian të femrave, duke i siguruar fitoren e 6-të në këto 13 ndeshje të luajtura deri më tani.
Skuadra e shqiptares ka qenë një nga më të goditurat nga epidemia e virusit korona në kampionatin italian të femrave, çka ka ndikuar edhe në rezultate. Por skuadra e kapitenes kuqezi po rikthehet dhe një ndihmesë të madhe po jep gjithnjë e më tepër edhe volejbollistja 1 m e 86 cm e lartë, e cila ka shënuar pikët që vulosën fitoren në të 3 setet e ndeshjes së vlefshme për javën e 14-të, ose javën e parë të fazës së dytë, ka marrë edhe vlerësimin e trajnerit të saj, Andrea Pistola.
“Po, në këtë ndeshje ajo ka dhënë një kontribut të madh në sulm, por për ne, ajo është një element i rëndësishëm, kështu që jam i kënaqur që ka bërë një paraqitje pozitive, sepse ajo ka nevojë për të mbajtur moralin lart, për të rritur besimin e saj, – ka thënë ai, duke folur pas fitores me Firencen. Kështu që kjo paraqitje e mirë në këtë ndeshje është një ogur i mirë që jep shpresë për një paraqitje të mirë të saj në këtë gjysmë të dytë të sezonit.”
Me 15 pikë të marra në 13 ndeshje, ekipi i Bicit ndodhet në mesin e renditjes, në vendin e 7-të, por për vetë formulën e këtij sezoni, ku 4 të para shkojnë direkt në çerekfinale të play-off-it për titull dhe 8 të tjera kualifikohen për në turin eliminator nga ku do të dalin edhe 4 çerekfinalistet e tjera, Kuneo mbetet në rrugë të mbarë për të vazhduar betejën edhe përtej sezonit të rregullt. Bici ka realizuar 107 pikë në 36 setet ku është aktivizuar, një shifër e kënaqshme kjo duke patur parasysh se volejbollistja 25-vjeçare ka munguar në disa prej ndeshjeve të fillimsezonit dhe është aktivizuar nga pak në disa të tjera për shkak të frakturës që pësoi në dorë gjatë përgatitjeve të parasezonit.
