ASNN – Emri i 45-vjeçarit gjermano-kroat konfirmohet dhe zyrtarizohet të enjten. Do të jetë gjermano-kroati Tomas Brdariç trajneri i ri i Vllaznisë. Ndonëse ende nuk është zyrtare, burime pranë klubit shkodran e kanë konfirmuar një gjë të tillë posaçërisht për AlbanianSport.com. Kanë premtuar një revolucion rrënjësor, me synimin e madh të rikthimit të klubit tek suksesi dhe tek lavdia e dikurshme dhe duket se drejtuesit e Vllaznisë e kanë nisur misionin e tyre mbi baza të shëndosha.
Kështu, pasi kanë konfirmuar në detyrën e drejtorit sportiv ish-futbollistin kroat, Matko Djarmati, drejtuesit kuqeblu duket se kanë zyrtarizuar edhe emrin e trajnerit të ri. Ndonëse ende nuk është zyrtare, burime pranë klubit shkodran kanë konfirmuar posaçërisht për AlbanianSport.com se ai do të jetë ish-futbollisti gjermano-kroat, Tomas Brdariç.
45-vjeçari ka luajtur në Gjermani përgjatë gjithë karrierës së tij 16-vjeçare, nga viti 1992 deri në 2008-ën, duke spikatur me Bajer Leverkusenin, si dhe duke e veshur 12 herë fanellën e përfaqësueses së Nën-21-vjeçarëve dhe 8 herë atë të të rriturve të Gjermanisë, me të cilën shënoi një gol. Në 2009-ën ka nisur karrierën kryesisht si trajner, por edhe si drejtor sportiv, ndërkohë që ka drejtuar skuadra kryesisht të nivelit inferior në futbollin gjerman, por ka drejtuar për një kohë të shkurtër edhe Shkëndijën e Tetovës.
Sidoqoftë, ardhja e një emri të tillë tek Vllaznia është një ogur i mirë për klubin shkodran, që gjatë këtyre sezoneve të fundit ka notuar në ujëra të turbullta, duke provuar, për herë të parë në histori, edhe rënien në Kategorinë e Parë, ndërsa një gjë të tillë e shmangu këtë sezon në duelin për mbijetesën me Besëlidhjen. Sipas burimeve në klubin kuqeblu, zyrtarizimi i trajnerit të ri pritet të bëhet të enjten.
