ASNN – Edhe pse homologu i tij në stolin e Kukësit, Orges Shehi, mendon se ishte skuadra verilindore e mbizotëroi ndeshjen e parë të gjysmëfinales së Kupës së Shqipërisë në futboll, trajneri i Teutës, Edi Martini u shpreh se ishte skuadra e tij që duhej të fitonte duke parë rastet e shumta që krijoi. Duke folur pas barazimit 0-0 me Kukësin në takimin e parë të gjysmëfinales, shkodrani u shpreh se ekipi i tij e ka kuptuar tashmë që ndeshjet duhet të merren “me thonj”, të luftohet me sakrificë.

“Kur u bë mbledhja, kam qenë dakord me një takim, sepse dihet gjendja e lojtarëve dhe kalendari i ngjeshur, – ka thënë ai, duke këmbëngulur tek ideja e tij e formatit të gjysmëfinaleve të Kupës me dy takime. – Megjithatë, kështu vendosën klubet. Ndeshjet e kampionatit janë shumë afër.” Më tej, 45-vjeçari ka analizuar kundërshtarin e Kupës, por edhe skuadrën e tij, duke thënë: “Të them të drejtën, e kam parë Kukësin duke luajtur. Kemi disa ndeshje që bëjmë shumë mirë. Ndeshjet janë të ngjeshura.”

“Mundohemi të marrim topin shpejt të mos e lejojmë kundërshtarin të na vërë nën trysni, – ka vijuar Martini. – Më vjen keq për rastet e humbura. Nëse shënon në fushën kundërshtare, ke fat. Duhej të shënonim që të ishim më të qetë.” Shkodrani i stolit të bregdetarëve nuk ka dashur të flasë shumë për pretendimet e skuadrës së tij për 11-metërsh, por ka këmbëngulur se skuadra e tij duhej ta fitonte ndeshjen. “Kemi hyrë në valle, – ka thënë trajneri i Teutës. – Nuk kemi si ta lëmë përgjysmë.”

“Jam me idenë të shkojmë deri në fund në kampionat dhe Kupë, – ka theksuar Edi Martini. – Të përqendrojmë forcat te Skënderbeu ditën e hënë. Na duhet dhe fati!  Normalisht, grupi është paksa i reduktuar. Janë të favorizuar dhe ekipet e tjera që kanë stol të fortë. Ndeshjet e kanë kuptuar që duhet të merren me thonj. Më pëlqen shpirti, sakrifica.”