ASNN – Fikret Shatri, tanimë me një sfidë të re. Ish-basketbollisti, 257 km me moton “Vrapi i shqipes nga Skënderbeu n’Skënderbe”. Kështu, ish-basketbollist i Prishtinës, Fikret Shatri, do të vrapojë 257 km me moton: “Vrapi i shqipes nga Skënderbeu n’Skënderbe”. Ai do të niset më 2 korrik, në ora 18:00, nga Sheshi “Skënderbeu” në Prishtinë, dhe pritet të mbërrijë në Tiranë, në Sheshin “Skënderbej” më 4 korrik 2020.

Nga parketi dhe shënimi i koshave, tek vrapimi për kauza kombëtare. Kjo është metamorfoza së cilës i është nënshtruar ish-basketbollisti dhe zëvendëstrajneri i Prishtinës, Fikret Shatri. Shatri është një sportist i njohur në Kosovë me një karrierë të gjatë si basketbollist dhe trajner i basketbollit. Pak javë më parë ai vrapoi nga Prishtina në Istog për 10 orë e 30 min në një distancë mbi 80 km.

Ai e realizoi i vetëm këtë sfidë duke bërë kështu edhe xhiron e mediave jo vetëm në Kosovë por edhe në Shqipëri e më gjerë. Fikret Shatri është anëtar i Federatës së Vrapimit Malor të Kosovës (“Kosova Trail Running Association”) dhe njihet edhe për shumë rekorde të tij të mëparshme. Ai ka kaluar me sukses maratonën e vrapimit malor prej 119 km, në Kapadoçia në Turqi.

Shatri tanimë ka një sfidë të re dhe ish-basketbollist i Prishtinës, do të vrapojë 257 km me moton: “Vrapi i shqipes nga Skënderbeu n’Skënderbe”. Ai do të niset më 2 korrik, në ora 18:00, nga Sheshi “Skënderbe” në Prishtinë, dhe pritet të mbërrijë në Tiranë, në Sheshin “Skënderbej” më 4 korrik 2020. Mësohet se Bordi Ekzekutiv i Komitetit Olimpik të Kosovës ka marrë vendim të mbështes rrugëtimin sfidues të Shatrit, nga njëri kryeqytet shqiptar në tjetrin.