ASNN – Lokomotiva e Zagrebit e 5 shqiptarëve kalon, por Osijeku i Grezdës eliminohet mes polemikash. Lokomotiva e Zagrebit, me 5 shqiptarë në 11-shen e parë, ka bërë detyrën, duke fituar 3-1 në fushën e Sllaven Belupos. Por Osijeku i Eros Grezdës ka shpërdoruar një epërsi dygolëshe dhe është mundur 2-3 në fushën e Rijekës, duke u eliminuar dhe duke shkuar kështu dëm mundësinë e një finaleje gjithëshqiptare në Kupën e Kroacisë në futboll.
Ishte shpresuar për një finale gjithëshqiptare në Kupën e Kroacisë, por nuk ka ndodhur kështu. Ndërkohë që Lokomotiva e Zagrebit, me 5 shqiptarë në 11-shen e parë, ka bërë detyrën, duke fituar 3-1 në fushën e Sllaven Belupos, Osijeku i Eros Grezdës ka shpërdoruar një epërsi dygolëshe dhe është mundur 2-3 në fushën e Rijekës, duke u eliminuar. Në fakt, në ndeshjen e parë, Lokomotiva e ka parë veten në disavantazh pas vetëm 6 minutash lojë përballë Slaven Belupos.
Por ajo ka arritur të përmbysë gjithçka me 3 gola të shënuar në 23 minutat e fundit të kohës së rregullt dhe ato 5 shtesë. Enis Çokaj ka barazuar shifrat për skuadrën kryeqytetas në minutën e 67-të, dhe, pasi Toliç ka përmbysur gjithçka 13 minuta më pas, do të jetë një tjetër futbollist shqiptar, Myrto Uzuni, ai që do të vulosë në minutën e 5-të shtesë fitoren e Lokomotivës së Zagrebit në shifrat 3-1 dhe bashkë me të vendin në finale.
Ndërkaq, Osijeku i Eros Grezdës ishte afër kalimit në finalen e Kupës së Kroacisë, por përjetoi një zhgënjim të madh në fundin e ndeshjes kundër Rijekës, që përmbysi disavantazhin e dyfishtë, duke fituar 3-2 dhe është ajo që do të luajë në finalen e madhe kundër Lokomotivës së Zagrebit. Osijek mbeti me një lojtar më pak në minutën e 56-të dhe protestoi ashpër për 11-metërshin e akorduar për Rijekën në minutën e 74-t, që solli barazimin momental të ndeshjes.
Acarimi te miqtë ka qenë i madh sipas mediave kroate dhe Eros Grezda nuk është përmbajtur aspak. Gjakovari i Osijek dhe kombëtares shqiptare, i cili luajti 62 minuta gjatë ndeshjes së mbrëmjes së kaluar, ka goditur me grusht Antonio Colak të Rijekës në fundin e ndeshjes. Ngjarja është raportuar nga delegati i takimit, Ivan Smokrovic, dhe ka ndodhur në parkingun e stadiumit. 25-vjeçari rrezikon shumë dhe pritet të dënohet nga Komisioni i Disiplinës.
