ASNN – Epidemia e virusit korona, që shpërtheu në shkallë globale, ka bërë që të ndryshojë shumëçka në sport dhe në futboll në veçanti, duke tronditur edhe shumë aspekte, që gati-gati ishin kthyer në tabu.
Një e tillë ka qenë edhe merkatoja e verës, apo thënë ndryshe edhe periudha shitblerjes së futbollistëve, që, zakonisht, niste me fillimin e qershorit dhe mbyllej në fund të gushtit.
Por, sipas asaj që raportojnë mediat italian, ndryshe nga praktika e deritanishme, merkatoja e verës në futboll për sezonin e ardhshëm, 2020-2021, do të hapet më 1 shtator 2020 dhe mbyllet më 5 tetor 2020.
Siç dihet, për shkak të virusit “Covid-19”, sezoni 2019-2020 në kampionatet kombëtare anembanë kontinentit të vjetër pritet të zgjasë deri më 4 gusht 2020, ndërsa Liga e Kampionëve dhe Liga e Evropës do të luhet deri në fund të gushtit.
Kësisoj, i gjithë kalendari i futbollit është transformuar si pasojë e epidemisë së virusit korona dhe, sipas të përditshmes sportive italiane, “Corriere dello Sport”, merkatoja e verës do të hapet më 1 shtator dhe mbyllet më 5 tetor 2020.
