ASNN – Klubi kroat ka nisur bisedimet me Teutën, emisarët e tij priten së shpejti në Durrës. Sipas asaj që raportojnë mediat kroate, të cilat u referohen burimeve pranë Lokomotivës së Zagrebit, skuadra bardheblu është e interesuar për një tjetër talent të futbollit shqiptar. Raportohet se Lokomotiva është në bisedime me Teutën e Durrësit, për të siguruar shërbimet e 22-vjeçarit Kallaku, i cili, deri kohët e fundit ishte kapiteni i Shpresave të Shqipërisë, me fanellën e së cilës ka luajtur 14 ndeshje.
Duket se Lokomotiva e Zagrebit vazhdon të jetë e dashuruar me futbollistët shqiptarë dhe shënjestra më e fundit e klubit kroat është Sherif Kallaku. Sipas asaj që raportojnë mediat kroate, të cilau u referohen burimeve pranë klubit kryeqytetas, pas Indrit Tucit, Enis Çokajt, Jon Mersinajt, Eros Grezdës dhe Myrto Uzunit, skuadra bardheblu është e interesuar për një tjetër talent të futbollit shqiptar.
Sipas mediave kroate, zbuluesi i talenteve për Kosovën dhe Shqipërinë, Besnik Prenga, por edhe drejtori i akademisë së të rinjve të Lokomotivës, Jurica Çabraja, pritet të udhëtojnë drejt Shqipërisë, për të parë nga afër mesfushorin me tipare sulmuese, kur skuadra durrsake të rikthehet në fushën e blertë për rifillimin e kampionatit. Paskëtaj pritet edhe përmbyllja e bisedimeve me synim kalimin e futbollistit shqiptar në klubin kroat.
Lokomotiva e Zagrebit, por edhe klubet e tjera kroate, apo edhe ato sllovene, kanë qenë një trampolinë mjaft e mirë për futbollistët shqiptare drejt kampionateve më të madhe të kontinentit të vjetër, dhe janë të shumtë ata që më pas kaluar në klube më me emër, siç ka qenë ndër të tjera, rasti i Adrian Aliajt, Bekim Balës, Sokol Cikalleshit, Adrian Ismajlit, Amir Rrahmanit.
