ASNN – Trajneri i Teutës flet për rikthimin në stërvitje, vështirësitë dhe pritshmëritë e sezonit. Sikundër të gjithë ekipet e tjera, edhe Teuta është rikthyer në stërvitje, pas ndërprerjes mëse dymujore për shkak të shkak të epidemisë së virusit korona. Dhe trajneri Edi Martini është optimist për pjesën e mbetur të sezonit, përtej vështirësive të rikthimit, aty ku si synim madhor shikon Kupën e Shqipërisë.
Teuta është rikthyer në stërvitje dhe për trajnerin Edi Martini, atmosfera e rifillimit në skuadër ka qenë pozitive. “Skuadrën e shoh me dëshirë të madhe për të arritur objektivat që kemi, – ka thënë ai. – Natyrisht duhet të kapim zonën e Evropës, por në mes kemi edhe Kupën, që do të tentojmë ta fitojmë, si dhe duhet të synojmë edhe vendin e dytë, pasi diferenca vetëm 4 pikë është.”
Megjithatë, shkodrani i stolit të durrsakëve nuk ka iluzione se rinisja nuk ka për të qenë e lehtë. “Të them të drejtën, rinisja ishte e vështirë, sepse ishte një kohë e gjatë kjo shkëputje, – ka pohuar Martini. – Megjithatë, djemtë janë stërvitur individualisht, por edhe me grupe dhe shoh një formë të mirë fizike, por, ajo çka është më kryesorja, një dëshirë të madhe për të fituar.”
45-vjeçari vlerëson edhe lejimin e 5 ndërrimeve, që sipas tij do ta ndihmojë futbollin në këtë rifillim. “Sigurisht që ky përjashtim u jep frymëmarrje dhe hapësirë skuadrave, sidomos atyre që e kanë stolin shumë të fortë, – ka thënë trajneri i bregdetarëve. – Edhe neve natyrisht që na bën mirë, por e përsëris që, më të favorizuar në këtë drejtim janë ato ekipe që e kanë stolin të fortë.”
Ish-futbollisti i njohur ka si synim madhor trofeun e Kupës së Shqipërisë në këtë vit jubilar të Teutës. “Me reale, por edhe me më tepër dëshirë, duke qenë se ky është edhe viti i 100-vjetorit të themelimit të klubit, do të zgjidhja të fitoja Kupën e Shqipërisë, – zbulon shkodrani. – Por, siç e thashë, objektivi ynë Evropa, sido që ajo të arrihet dhe kjo nuk diskutohet.
Teuta mban hëpërhë vendin e 5-të në renditjen e Kategorisë Superiore, me 40 pikë të marra në 26 javë kampionat, 13 më pak sesa Tirana kryesuese, por 4 më pak sesa Kukësi i vendit të dytë. Në karrierën e tij 13-vjeçare si trajner, Edi Martini po e drejton për herë të dytë Teutën, ashtu siç ka drejtuar dy herë Luftëtarin, por edhe nga një herë Laçin dhe Vllazninë.
