ASNN – Tanimë ka rënë një tjetër “kala” e virusit korona dhe Primera Liga spanjolle do të nisë në fillim të muajit qershor. Kështu, një tjetër kampionat i madh për tifozët, që do të kenë mundësinë të shohin ndeshje të niveli të lartë përmes TV-ve, pasi nuk mund të luhet akoma me praninë e publikut.

Raportohet se qeveria spanjolle ka dhënë miratimin që të luhet prej 8 qershorit 2020, çka përbën një lajm i mirë. “Me miratimin e Këshillit të Lartë të Sporteve, është dhënë drita jeshile që liga profesioniste e futbollit të nisë përsëri, nga 8 qershori”, – thuhet në njoftimin që përcjellin mediat vendase.

“Muzetë, kinematë, koncertet dhe teatrot gradualisht do rikthehen siç ishin”, – shton njoftimi i autoriteteve spanjolle. Në Spanjë numri i të prekurve dhe viktimave nga “COVID-19” ka ardhur në rënie, ndërkohë që edhe masat që pritet të merren do ndihmojnë në parandalimin e përhapjes së virusit.

Kampionati i parë i madh i vende të Evropës që nisi ishte Bundesliga gjermane, e cila ngriti siparin më 16 maj, ndërkohë që tani mbetet të mësohet se kur do të nisë të luhet Seria A e Italisë dhe Premier Liga Angleze, kurse Liga 1 e Francës, në mënyrë absurde, e ka mbyllur sezonin para kohe.