ASNN – 8-herë kampioni i botës zbulon prapaskenat e rinovimit të marrëveshjes 4-vjeçare. Mark Markezi ka zbuluar për “Sky Sports Italia” që “Dukati” i kishte provuar për t’i bërë një ofertë dhe për ta bindur të ndërronte motor, përpara se 8 herë kampioni i botës të nënshkruante një marrëveshje të re 4-vjeçare me skuadrën zyrtare të “Honda”-s. Një lajm i tillë vjen pasi edhe një tjetër piloti spanjoll, Maverik Vinjalesi i “Jamaha”-s zyrtare, ka pranuar se kishte patur bisedime me skuadrën italiane, përpara se ai të rinovonte marrëveshjen e tij me skuadrën japonez.
Ndërkohë, skuadra me bazë në Bolonjë, nuk ka bërë ende të ditur se kush do t’i pilotojë dy motorët e saj “Dezmosediçi” në 2021-shin e më pas. 8 herë kampioni i botës ka folur edhe për ofertën e papritur të kontratës afatgjatë nga “Honda” dhe ndjesia që ka për zgjaten e këtij bashkëpunimi deri në vitin 2024. “Ideja fillestare ishte nga “Honda”, – pohoi 27-vjeçari spanjoll, teksa shpjegonte se si lindi kontrata më e gjatë në historinë e Moto GP-së. “Sinqerisht, unë nuk kisha menduar akoma për këtë, por ne filluam të flasim dhe pamë se ishte një projekt me interes për të gjithë”, – ka vijuar ai.
“Asnjë ekip nuk ofronte më shumë se “Honda” në projektin e saj sportiv dhe ata besuan tek unë, – ka pohuar Markezi. – Dhe kështu lindi ky projekt 4-vjeçar, që ndodh për herë të parë në histori. Në fund të kontratës, ne do të shikojmë nëse kishim të drejtë në zgjedhjen tonë.” Gjatë intervistës së tij, piloti që ka dominuar gjatë dhjetëvjeçarit të fundit Moto GP-në, i është përgjigjur pyetjes që bëjnë tifozët në të gjithë botën: A do të kemi ndonjëherë mundësinë për ta parë atë të konkurrojë me një motor tjetër? “Unë jam 27-vjeçar dhe kam një kontratë edhe për 4 vjet të tjerë”, – ka thënë Mark Markezi.
“Asnjëherë nuk i dihet. Kam dëgjuar njerëzit që thonë se duhet të fitoj edhe me një motor tjetër, por unë e mora vendimin me zemrën time. “Honda” më dha mundësi për të kaluar nga “Moto 2”-shi dhe për të fituar. Unë ka dëgjuar edhe ofertën e “Dukati”-t, por projekti i “Honda”-s ishte më i miri nga pikëpamja sportive. Për momentin, unë them jo, por në të ardhmen, kurrë nuk e dihet”, – ka përfunduar piloti spanjoll i skuadrës japoneze.
